Առաջնության 13-րդ տուրում ուշադրության կենտրոնում «Միկայի» եւ «Փյունիկի» մրցավեճն էր: Առաջին շրջանում, մեկնարկային տուրում «Փյունիկը» 1-0 հաշվով հաղթել էր «Միկային» եւ պետք էր սպասել, որ Հայաստանի գավաթակիրը կձգտի ռեւանշի: Սակայն ռեւանշը չկայացավ: «Միկային» այդպես էլ չհաջողվեց գտնել մրցակցի դարպասի բանալին: Ճիշտ է, սեփական դարպասն էլ «Միկան» պահեց անառիկ: Ի դեպ, արդեն 490 րոպե «Միկայի» դարպասապահ Գառնիկ Հովհաննիսյանը դարպասը պահում է անառիկ: Իսկ ահաՙ «Փյունիկին» միավորները դժվարությամբ են տրվում: Հենկ Վիսմանի գլխավորությամբ թիմի անցկացրած չորս խաղում չեմպիոնը վաստակել է ընդամենը 6 միավոր (3 ոչ-ոքի, 1 հաղթանակ)ՙ խփելով ընդամենը մեկ գոլ: Սա, իրոք, մտահոգիչ էՙ հաշվի առնելով, որ հուլիսի 13-ին «Փյունիկը» չեմպիոնների լիգայի որակավորման առաջին խաղում մրցելու է ֆիննական «Հակայի» հետ:
«Էսթեղլալ-Կոտայքին» էլ չհաջողվեց «Բանանցի» նկատմամբ ռեւանշի հասնել առաջնությունում կրած միակ պարտության դիմաց: Ճիշտ է, այդ խաղի 22-րդ րոպեին կոտայքցի Արման Մինասյանը բացեց հաշիվը, սակայն 15 րոպե անց Տիգրան Ղարաբաղցյանը վերականգնեց հավասարակշռությունը: Իսկ ահա «Կիլիկիան» «Լեռնագործի» հետ խաղում կրկին աչքի ընկավ արդյունավետ գրոհներով: Եվ ինչպես մրցակիցների առաջին շրջանի խաղում, այս անգամ եւս «Կիլիկիան» 5 անպատասխան գնդակ ուղարկեց մրցակցի դարպասը: 3 գոլ խփեց եւ առաջնության լավագույն ռմբարկուների ցուցակը գլխավորեց Նշան Էրզրումյանըՙ դառնալով ընթացիկ առաջնության անդրանիկ «հեթ-տրիկի» հեղինակը: Մեկական գնդակ էլ խփեցին Սարգիս Մովսիսյանն ու Սուրեն Աթոյանը:
Այն բանից հետո, երբ առաջնությունից հրաժարվեց «Լեռնային Արցախը», այլեւս անիմաստ է դառնում մրցաշարի 2 փուլով անցկացումը: Կարծում ենք, նպատակահարմար է կրկին 4 շրջանով առաջնության անցկացումը: Նաեւ շտապ կարգով պետք է որոշվի առաջին խմբից բարձրագույն խումբ տեղափոխվող թիմերի քանակն ու խմբից խումբ ակումբների տեղափոխման կարգը, որպեսզի հետագայում ավելորդ վիճելի հարցեր չառաջանան: Առայժմ դեռ պարզ չէ, թե ինչպե՞ս են վարվելու «Լեռնային Արցախի» մասնակցությամբ հանդիպումներում թիմերի վաստակած միավորների հետ, ուստի ներկայացվող մրցաշարային աղյուսակում հաշվի են առնված բոլոր խաղերի արդյունքները:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 12 | 8 | 4 | 0 | 20-5 | 28 |
| 2. Միկա | 12 | 7 | 4 | 1 | 17-6 | 25 |
| 3. Բանանց | 11 | 6 | 3 | 2 | 13-11 | 21 |
| 4. Էսթ.-Կոտայք | 12 | 5 | 6 | 1 | 20-9 | 21 |
| 5. Կիլիկիա | 11 | 4 | 3 | 4 | 20-14 | 15 |
| 6. Դին.-Զենիթ | 11 | 2 | 3 | 6 | 10-15 | 9 |
| 7. Շիրակ | 11 | 2 | 2 | 7 | 13-24 | 8 |
| 8. Լեռնագործ | 11 | 1 | 1 | 9 | 4-25 | 4 |
Ռմբարկուները
| Նշան Էրզրումյան | «Կիլիկիա» | 9 |
| Արտյոմ Ադամյան | «Միկա» | 7 |
| Սամվել Պետրոսյան | «Էսթ.-Կոտայք» | 6 |
| Էդգար Մանուչարյան | «Փյունիկ» | 5 |
| Սարգիս Մովսիսյան | «Կիլիկիա» | 5 |
ԱՇՈՏ ՀԱՅՐԱՊԵՏՅԱՆ