ՀՀ հավաքականը լուրջ մտադրություններով է ասպարեզ մտնելու
Հայաստանի մինչեւ 19 տարեկանների պատանեկան հավաքականը հուլիսի 18-ին Նորվեգիայի իր հասակակիցների հետ հանդիպումով կսկսի մրցավեճը Հյուսիսային Իռլանդիայում մեկնարկող ֆուտբոլի Եվրոպայի պատանեկան առաջնության պարգեւների համար: Ինչ խոսք, մեր պատանիներին լուրջ փորձություն է սպասում: Սակայն հաշվի առնելով վերջին տարիներին մեր պատանիների հաջող մրցելույթները, ֆուտբոլասերները լավատեսորեն են տրամադրված: Լուրջ նպատակներով են մրցասպարեզ դուրս գալու մեր հավաքականի անդամները, որոնք հուլիսի 4-ից Եվրոպայի առաջնությանը նախապատրաստվում էին Փարիզից 20 կմ հեռավորության վրա գտնվող Օբոն քաղաքի նորակառույց մարզաբազայում: Ուսումնամարզական հավաքի մեկնելուց առաջ հավաքականի գլխավոր մարզիչ Սամվել Պետրոսյանը նշել էր, որ հավաքականը նվազագույնը պետք է հասնի մինչեւ կիսաեզրափակիչ: Իսկ հավաքականի մարզիչ Աշոտ Բարսեղյանն «Ազգի» թղթակցի հետ զրույցում հետեւյալն էր ասել. «Երբ ընտրական մրցաշարից առաջ հայտարարում էինք, որ Հունգարիա ենք մեկնում եզրափակիչի ուղեգիր նվաճելու, շատերը թերահավատորեն էին վերաբերում մեր խոսքերին: Սակայն, ինչպես հայտնի է, կարողացանք գրավել առաջին տեղը եւ նվաճել միակ ուղեգիրը: Այժմ էլ Հյուսիսային Իռլանդիա ենք մեկնում լուրջ նպատակներով: Իհարկե, շատ դժվարին մրցապայքար է սպասվում, սակայն ձգտելու ենք առավելագույն արդյունքի»:
Իհարկե, մարզիչների լավատեսությունը հիմնավոր է, մնում է, որ պատանի ֆուտբոլիստները կարողանան դրսեւորել իրենց լավագույն ձեւով եւ արդարացնեն սպասելիքները: Ինչ խոսք, շատ բան պայմանավորված կլինի հավաքականի առաջատարներ էդգար Մանուչարյանի, Ապուլա Բետեի, Կառլ Լոմբեի, Ժորա Հովհաննիսյանի խաղով: Առաջին երեքը չմասնակցեցին Ֆրանսիայում կազմակերպված ուսումնամարզական հավաքին: Էդգարն «Այաքսի» կազմում էր նախապատրաստվում նոր մրցաշրջանինՙ մասնակցելով թիմի ընկերական հանդիպումներին: Իսկ Բետեն ու Լոմբեն «Փյունիկի» կազմում մասնակցեցին «Հակայի» հետ մրցախաղին: Այժմ այս եռյակը միացել է խաղընկերներին: Մեր հավաքականում ընդգրկված են նաեւ Գուրգեն Մելիքսեթյանը, Արթուր Ստեփանյանը, Արմեն Ֆիշյանը, Հայկ Չիլինգարյանը, Խորեն Վերանյանը, Մխիթար Գրիգորյանը, Արտակ Օսեյանը, Ռաֆայել Սաֆարյանը, Ալեքսանդր Պետրոսյանը, Գեւորգ Նռանյանը, Արտակ Հովհաննիսյանը, Վահե Մեհրաբյանը, Միխել Սիմոնյանը, Նարեկ Մանուկյանը եւ Արմեն Հովհաննիսյանը:
Եվ այսպես, հուլիսի 18-ին Հյուսիսային Իռլանդիայում կմեկնարկի մինչեւ 19 տարեկանների Եվրոպայի պատանեկան առաջնության եզրափակիչ փուլը: Չեմպիոնի կոչումը վիճարկող 8 հավաքականները նախնական փուլում բաժանվել են 2 խմբի: «A» խմբում ընդգրկված են Գերմանիայի, Սերբիայի, Հյուսիսային Իռլանդիայի եւ Հունաստանի հավաքականները: «B» խմբում Հայաստանի հավաքականի մրցակիցներն են Անգլիայի, Ֆրանսիայի եւ Նորվեգիայի ընտրանիները: Հանդիպումները տեղի կունենան Բելֆաստում, Նյուրիում, Լուրգանում եւ Բալիմենայում: Չեմպիոնը հայտնի կդառնա հուլիսի 29-ին Բելֆաստի «Վինձոր պարկ» մարզադաշտում կայանալիք եզրափակիչում: Ներկայացնում ենք առաջնության խաղացանկը:
Հուլիսի 18-ին
| Լուրգան | Նորվեգիա-Հայաստան | 20.00 |
| Բելֆաստ | Ֆրանսիա-Անգլիա | 18.00 |
| Նյուրի | Սերբիա-Գերմանիա | 20.00 |
| Բալիմենա | Հս. Իռլանդիա-Հունաստան | 20.30 |
Հուլիսի 20-ին
| Բալիմենա | Հայաստան-Անգլիա | 20.00 |
| Բելֆաստ | Նորվեգիա-Ֆրանսիա | 21.00 |
| Լուրգան | Գերմանիա-Հունաստան | 18.00 |
| Նյուրի | Հս. Իռլանդիա-Սերբիա | 20.00 |
Հուլիսի 23-ին
| Լուրգան | Հայաստան-Ֆրանսիա | 20.00 |
| Նյուրի | Անգլիա-Նորվեգիա | 20.00 |
| Բալիմենա | Գերմանիա-Հս. Իռլանդիա | 18.00 |
| Բելֆաստ | Հունաստան-Սերբիա | 18.00 |
Հուլիսի 26-ին
| Լուրգան | A1-B2 | 17.30 |
| Բալիմենա | B1-A2 | 20.30 |
Հուլիսի 29-ին
| Բելֆաստ | Եզրափակիչ | 20.00 |
Խաղերի սկիզբը տրված է տեղական ժամանակով: