ՈՒԵՖԱ-ի գավաթի խաղարկության որակավորման առաջին փուլի մեկնարկը չափազանց անհաջող էր Հայաստանի գավաթակիր «Միկայի» համար: Ֆրանկֆուրտում մեր ֆուտբոլիստները խոշորՙ 0-4 հաշվով զիջեցին Գերմանիայի «Մայնցին»: Արդեն 8-րդ րոպեին Ռումանը բացել է խաղի հաշիվը, իսկ 36-րդ րոպեին Աուերը երկրորդ գնդակն է ուղարկել «Միկայի» դարպասը: Ընդմիջումից հետո եւս երկու անգամ Նովեսկու (58) եւ Աուերի (68-րդ րոպե) հարվածներից հետո գնդակը հայտնվել է հյուրերի դարպասում: Ճիշտ է, «Մայնցը» եվրոգավաթների մասնակից մեր թիմերի մրցակիցներից ամենաուժեղն էր, սակայն «Միկայից» նման ջախջախիչ հաշվով պարտություն չէինք սպասում: Այսպիսով, եվրոգավաթների մրցաշարերի մեկնարկում մեր թիմերը պարզապես հիասթափեցրին ֆուտբոլասերներին իրենց անփառունակ, ինչ-որ տեղ նաեւ խայտառակ ելույթներովՙ մրցակիցներին զիջելով ընդհանուր 2-8 հաշվով: Սա եւս մեկ վկայությունն է հայկական ֆուտբոլի խիստ ցածր խաղամակարդակի եւ տիրող ճգնաժամի:
Ի տարբերություն մեր հանրապետության ներկայացուցիչների, ԱՊՀ եւ բալթյան երկրների թիմերը բավական հաջող ելույթներ ունեցան: Նախ եւ առաջ նշենք Բելառուսի ՄՏԶ-ՌԻՊՕ թիմի հաջողությունը, որում վերելքով է հանդես գալիս Երեւանի «Արարատի» նախկին ֆուտբոլիստ, Հայաստանի ազգային հավաքականի անդամ Համլետ Մխիթարյանը: Հենց նա էլ հյուրընկալվելիս 37-րդ րոպեին գրավել է հունգարական «Ֆերենցվարոշի» դարպասըՙ դնելով հաղթանակի հիմքը: ՄՏԶ-ՌԻՊՕ-ն հաղթել է 2-0 հաշվով եւ հիանալի հնարավորություն ունի մտնելու հաջորդ փուլ:
Ադրբեջանի «Բաքուն» սեփական հարկի տակ հաղթել է բավական հայտնի Սլովակիայի «Ժիլինային» (1-0): «Նիստրու» -«Խազար» խաղում հաղթել են մոլդովացիները (3-1): «Ֆլորան» հյուրընկալվելիս պարտության է մատնել շվեդական «Էսբերգին» (2-1): Տալինի ՏՎՄԿ-ն ոչ-ոքի է խաղացել ֆիննական Մյուպայի հետ (1-1):
Մյուս խաղերում գրանցվել են հետեւյալ արդյունքները. «Էկրանաս»-«Կորկ Սիթի»ՙ 0-2, «Տորպեդո» Ք.-ԲԱՏԷՙ 0-1, «Տեուտա»-«Սիրոկի»ՙ 3-1, «Ալյանսի»-«Պետանժ»ՙ 3-0, «Էլբասանի»-«Վարդար»ՙ 1-1, «Բաշկիմի»-«Ժեպչե»ՙ 0-0, «Էտցելա»-«Կեֆլավիկ»ՙ 0-4, «Սանտ Ջուլիա»-«Ռապիդ» Բ.ՙ 0-5, «Օմոնիա»-«Հիբերնիանս»ՙ 3-0, «Ռունավիկ»-«Մետալուրգ» Լիեպայաՙ 1-2, «Վադուց»-«Դաչիա»ՙ 2-0, «Վեստմանյար»-«Տորսհավն»ՙ 1-1, Պորտդաուն»-«Վիկինգ»ՙ 1-2, «Լոնգֆորդ»-«Կարմաթեն»ՙ 2-0, «Ռիլ»-«Ատլանտաս»ՙ 2-1, «Դոմանյանո»-«Դոմզալե»ՙ 0-5, «Լինֆիլդ»-«Վենտսպիլս»ՙ 1-0, «Բիրկիրկարա»-«Ապոել»ՙ 0-2: