Եվրոգավաթների մրցաշարում անհաջողության մատնված թիմերիՙ «Բանանցի» եւ «Միկայի» մրցավեճը, որով սկսվեց առաջնության 15-րդ փուլը, աչքի ընկավ գոլերի առատությամբ: Այս հանգամանքը կարող էր ուրախացնել երկու թիմերի երկրպագուներին եվրոգավաթների պատասխան հանդիպումներից առաջ, եթե խփված գոլերն իրոք լինեին ֆուտբոլիստների վարպետության, այլ ոչ թե պաշտպանների սխալների արդյունք: Թե՛ «Միկան», թե՛ «Բանանցը» թիկունքում անհաջող խաղացին, որի արդյունքում մրցակցի հարձակվողները հաճախակի հսկողությունից դուրս էին մնում եւ անարգել գրավում դարպասը:
Արդեն առաջին խաղակեսում կողմերը 3-ական գնդակ փոխանակեցին: Հաշիվը բացեց «Բանանցի» լեգեոներ Գուշիլան, որից հետո Տիգրան Դավթյանն ու Արմեն Պետիկյանն առաջ մղեցին «Միկային»: Սակայն 2 րոպե անց Արարատ Առաքելյանը հավասարեցրեց հաշիվը: Իսկ մինչեւ խաղավարտ Շեւչենկոն ու Արամ Հակոբյանը հաշիվը դարձրին 3-3:
Ընդմիջումից հետո էլ կրկին թիմերի պաշտպաններն իրենց բարձրության վրա չէին: 55-րդ րոպեին հերթական գոլն իր օգտին գրանցեց Արտյոմ Ադամյանըՙ առաջ մղելով «Միկային»: Սակայն դա էլ բավարար չէր հաղթանակի հասնելու համար: Խաղավարտից 6 րոպե առաջ հերթական սխալը թույլ տվեց «Միկայի» դարպասապահ Գառնիկ Հովհաննիսյանը եւ Ղարաբաղցյանը կրկին վերականգնեց հավասարակշռությունը: Թեեւ գոլերի առատությանը, թե՛ մարզիչները, թե՛ սակավաթիվ ֆուտբոլասերները դժգոհ մնացին երկու թիմերի ցուցադրած խաղի որակից:
Անակնկալ արդյունք գրանցվեց Ոսկեհատում կայացած «Լեռնագործ»-«Շիրակ» խաղում: Առաջնության ակնհայտ հետնապահը շնորհիվ 72-րդ րոպեին Կարեն Նավոյանի խփած միակ գոլի հաղթանակ տոնեց:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 13 | 9 | 4 | 0 | 25-5 | 31 |
| 2. Միկա | 14 | 8 | 5 | 1 | 23-10 | 29 |
| 3. Բանանց | 13 | 7 | 4 | 2 | 20-15 | 25 |
| 4. Էսթ.-Կոտայք | 14 | 6 | 6 | 2 | 26-14 | 24 |
| 5. Կիլիկիա | 13 | 6 | 3 | 4 | 27-16 | 21 |
| 6. Դին.-Զենիթ | 13 | 3 | 3 | 7 | 14-17 | 12 |
| 7. Շիրակ | 13 | 3 | 2 | 8 | 16-25 | 11 |
| 8. Լեռնագործ | 14 | 2 | 1 | 11 | 5-34 | 7 |
Ռմբարկուները
| Նշան Էրզրումյան | «Կիլիկիա» | 11 |
| Արտյոմ Ադամյան | «Միկա» | 8 |
| Սամվել Պետրոսյան | «Էսթ.-Կոտայք» | 6 |
| Արման Մինասյան | «Էսթ.-Կոտայք» | 6 |
| Սարգիս Մովսիսյան | «Կիլիկիա» | 6 |
ԱՇՈՏ ՀԱՅՐԱՊԵՏՅԱՆ