Հայաստանի վարչապետը հուլիսի 24-ին աշխատանքային այցով մեկնելու է Վրաստանի Սամցխե-Ջավախքի երկրամաս: Վրաստանի վարչապետ Զուրաբ Նողայիդելին իր հայ գործընկերոջը կընդունի հայ-վրացական սահմանագլխինՙ Նինոծմինդայում: Վարչապետ Անդրանիկ Մարգարյանը կայցելի շրջանային կենտրոններ Նինոծմինդա եւ Ախալքալաք, Վարձիայի վանական համալիր, Գանձա, որտեղ ծնվել է Վահան Տերյանը, ինչպես նաեւ հայկական Սամսար գյուղ, որտեղ վերջերս տեղի էր ունեցել ընդհարում տեղացիների եւ ժամանած վրաց հոգեւորականության ու ուսանողների միջեւ: Հայաստանի վարչապետը հուլիսի 25-ին կմեկնի Թբիլիսի, որտեղ նախատեսված է նրա հանդիպումը Միխայիլ Սաակաշվիլու հետ: