Հայաստանի գիտությունների ազգային ակադեմիան, կրթության եւ գիտության նախարարությունը, Երեւանի պետական համալսարանը, Ալիխանյանի անվան ֆիզիկայի ինստիտուտը, ֆիզիկոսների հայկական ընկերությունը սեպտեմբերի 11-15-ը կանցկացնեն հայ ֆիզիկոսների միջազգային առաջին կոնգրեսը: Մասնակիցները կքննարկեն եւ կվերլուծեն ֆիզիկայի բնագավառի ներկա վիճակը, մասնավորապես աստղաֆիզիկայի, ռադիոֆիզիկայի, միջուկային, լազերային ֆիզիկայի եւ այլ ճյուղերի վերջին հետազոտությունների արդյունքները: Միջոցառման կազմակերպիչները համոզված են, որ կոնգրեսի աշխատանքը կարող է օգնել կառավարությանը որոշելու Հայաստանում գիտության գերակա ուղղությունների, տվյալ դեպքում ֆիզիկայի կարեւորությունը:
ՄԱԿ-ի Գլխավոր ասամբլեայի 2004 թ. հունիսի 16-ի որոշմամբ 2005 թվականը հայտարարվել էր ֆիզիկայի միջազգային տարիՙ նվիրված Ալբերտ Էյնշտեյնի 3 խոշոր հայտնագործությունների 100-ամյակին, եւ առաջարկվել է միջոցառումներ անցկացնել բոլոր երկրներում, այդ թվումՙ Հայաստանում:
Կոնգրեսին կմասնակցեն Ռուսաստանից, Մ. Նահանգներից, Կանադայից, Ֆրանսիայից, Մեծ Բրիտանիայից եւ այլ երկներից ժամանած ավելի քան 150 հայ ֆիզիկոսներ:
Ռ. Պ.