«ԱԶԳ» ՕՐԱԹԵՐԹ

ՊԱՐՏՈՒԹՅՈՒՆՆԵՐԸ ՆՊԱՍՏԵՑԻՆ... ԱՌԱՋԸՆԹԱՑԻՆ

ՖԻՖԱ-ն հրապարակել է ազգային հավաքականների վարկանիշային հերթական ցուցակը սեպտեմբերի դրությամբ: Որքան էլ որ զարմանալի է, չնայած Հոլանդիայի եւ Չեխիայի հավաքականներից կրած պարտություններին, Հայաստանի ընտրանին նախորդ ամսվա համեմատ 5 հորիզոնականով վեր է բարձրացել եւ այժմ զբաղեցնում է 115-րդ տեղը: Ընդհանրապես ընտրական մրցախաղերի արդյունքներն այս անգամ բավական փոփոխություններ են մտցրել վարկանիշային ցուցակում: Նախորդ ամսվա համեմատ ամենամեծ առաջընթացն ունեցել է Լիխտենշտեյնի հավաքականը, որը 16 տեղով բարձրացել էՙ զբաղեցնելով 123-րդ հորիզոնականը: Անգլիացիների նկատմամբ տոնած պատմական հաղթանակի շնորհիվ հյուսիսիռլանդացիները 15 հորիզոնականով են առաջընթաց ապրել: 12-ական տեղով վեր են բարձրացել Տոգոյի եւ Շոտլանդիայի հավաքականները: Իսկ ահա Իրաքի ընտրանին ամենամեծ նահանջն է ապրել (11 տեղով): 10-ական հորիզոնականով նահանջել են Բելառուսի եւ Օմանի հավաքականները:

Փոփոխություններ են տեղի ունեցել նաեւ լավագույն տասնյակում: Հոլանդացիները 2 հաղթանակի շնորհիվ ցուցակում շրջանցել են արգենտինացիներինՙ զբաղեցնելով 2-րդ տեղը: Հարկ է նշել, որ «նարնջագույնները» ցուցակում դեռեւս այսքան բարձր տեղ չէին զբաղեցրել: 3 հորիզոնականով վեր են բարձրացել ֆրանսիացիները (6-րդ տեղ), իսկ ԱՄՆ-ի հավաքականը մեկ տեղով նահանջել է: Տասնյակից դուրս է մնացել Անգլիայի հավաքականը, որին փոխարինել են շվեդները: Ընտրական մրցաշարում ՀՀ հավաքականի մյուս մրցակիցներից չեխերը պահպանել են իրենց դիրքերը (4-րդ տեղ): Ամենամեծ առաջընթացն ունեցել է Անդորրայի ընտրանին, որը 9 հորիզոնականով վեր է բարձրացել եւ այժմ զբաղեցնում է 125-րդ տեղը: Ֆինները 3 տեղով են վեր բարձրացել (40-րդ հորիզոնական): Մակեդոնացիները նահանջել են 4 տեղով եւ այժմ զբաղեցնում են 96-րդ հորիզոնականը: Ռումինացիները 31-րդ տեղից նահանջել են մեկ հորիզոնականով:

Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները.