Ֆուտբոլի Հայաստանի բարձրագույն խմբի առաջնության հերթական տուրը զգալիորեն սրեց մրցակցությունը մրցանակային տեղերի համար: Եթե երկրի չեմպիոնի կոչման հարցը գրեթե կասկած չի հարուցում, ապա արծաթե եւ բրոնզե մեդալների համար պայքարը նոր ուժով է բորբոքվում: Դրան նպաստեցին առաջնության 21-րդ տուրում գրանցված արդյունքները:
Առաջնության երկրորդ փուլում հաջող հանդես եկող «Էսթեղլալ-Կոտայքը», «Հրազդանում» հաղթելով «Կիլիկիային» (1-0), շրջանցեց «Միկային» ու «Բանանցին» եւ ամրապնդվեց 2-րդ տեղում: Կոտայքցիներին հաղթանակ պարգեւեց թիմի ռմբարկու Սամվել Պետրոսյանի 71-րդ րոպեին խփած գնդակը:
Բավական համառ ու անզիջում մրցապայքար ծավալվեց Ոսկեհատում, որտեղ «Միկան» հյուրընկալել էր «Դինամո-Զենիթին»: Վերջինիս համար առաջնությունը թերեւս կարելի է ավարտված համարել, ուստի քչերն էին հավատում, որ դինամոյականները համառ դիմադրություն ցույց կտան մրցակցին: Սակայն «Դինամո-Զենիթն» իրեն հիանալի դրսեւորեց: Ապավինելով հակագրոհների տակտիկային, հաջողությամբ դիմագրավելով «Միկայի» գրոհներին, դինամոյականները 2 անգամ հասան հաջողության: Երկու դեպքում էլ «Միկայի» պաշտպանները ստիպված էին արգելված հնարքով կանխել հյուրերի վտանգավոր ճեղքումները, որի համար պատժվեցին 11 մ հարվածներով: Դրանք անվրեպ իրացրեց Գագա Թբիլաշվիլին:
Ունենալով խաղային եւ տարածքային զգալի առավելություն, ստեղծելով բազում վտանգավոր պահեր, «Միկան» ի վերջո խաղադաշտը թողեց պարտված: Միայն մեկ անգամ, այն էլ 11 մ հարվածով Արմեն Շահգելդյանին հաջողվեց խոցել մրցակցի դարպասը: Այդ գոլից քիչ անց Շահգելդյանը ձեռքով խաղալու եւ մրցավարի որոշման հետ չհամաձայնվելու համար հեռացվեց խաղադաշտից: 2 րոպե անց «Միկան» մնաց 9 հոգով: Այս անգամ էլ սեփական տուգանային հրապարակում խախտում կատարելու համար մրցավարը դաշտից հեռացրեց Վիրաբ Մեյթիխանյանին: Մնալով 9 հոգով, «Միկան» չկարողացավ փրկել խաղը, իսկ ահա դինամոյականները խաղավերջում կարող էին եւս երկու գոլ խփել:
Երկրի չեմպիոն «Փյունիկը» «Բանանցի» հետ հանդիպման արդեն 3-րդ րոպեին Արա Ոսկանյանի խփած գոլի շնորհիվ հաշվի մեջ առաջ անցավ: 62-րդ րոպեին Վալերի Ալեքսանյանը 2-րդ գոլը խփեց եւ թվում էր, թե խաղի ելքը վճռված է: Սակայն խաղավարտից 6 րոպե առաջ Արարատ Առաքելյանը կրճատեց հաշվի տարբերությունը, իսկ վերջին րոպեին Արա Խաչատրյանը թիմին փրկեց պարտությունից: Այսպես, ընդամենը 6 րոպեում «Բանանցին» հաջողվեց վերականգնել հավասարակշռությունը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 13 | 8 | 5 | 0 | 25-7 | 29 |
| 2. Էսթ.-Կոտայք | 13 | 4 | 7 | 2 | 15-11 | 19 |
| 3. Միկա | 13 | 4 | 6 | 3 | 17-13 | 18 |
| 4. Բանանց | 13 | 4 | 6 | 3 | 17-18 | 18 |
| 5. Կիլիկիա | 13 | 2 | 4 | 7 | 13-22 | 10 |
| 6. Դին.-Զենիթ | 13 | 2 | 2 | 9 | 10-16 | 8 |
Ռմբարկուները
| Նշան Էրզրումյան | «Կիլիկիա» | 13 |
| Արտյոմ Ադամյան | «Միկա» | 8 |
| Աղվան Մկրտչյան | «Փյունիկ» | 8 |
| Սամվել Պետրոսյան | «Է.-Կոտայք» | 8 |
| Տիգրան Դավթյան | «Փյունիկ» | 7 |
ԱՇՈՏ ՀԱՅՐԱՊԵՏՅԱՆ