Այսօր եռօրյա այցով Բելգիա եւ եվրոպական կառույցներ է մեկնում Հայաստանի նախագահ Ռոբերտ Քոչարյանը: Բրյուսելում նախատեսված են նախագահ Քոչարյանի հանդիպումները Եվրոմիության, Հյուսիսատլանտյան դաշինքի եւ Բելգիայի բարձրաստիճան պաշտոնյաների հետ: Մասնավորապես հանրապետության ղեկավարը բանակցություններ կունենա ՆԱՏՕ-ի գլխավոր քարտուղար Յաափ դե Հուփ Սխեֆերի, ԵՄ միասնական պաշտպանական եւ արտաքին քաղաքականության հարցերով հանձնակատար Խավիեր Սոլանայի, Եվրոհանձնաժողովի նախագահ Ժոզե Մանուել Բառոզուի, Եվրոխորհրդարանի նախագահ Ժոզեֆ Բորել Ֆոնտելսի, Բելգիայի վարչապետ Գի Վերհոֆշթադի, Ներկայացուցիչների պալատի եւ Սենատի նախագահների հետ:
Աշխատանքային այցի ընթացքում նախագահ Քոչարյանը ծաղկեպսակ կդնի Հայոց ցեղասպանության զոհերի խաչքարին, կհանդիպի բելգիահայ համայնքին, կմասնակցի Հայաստանի դեսպանության նոր շենքի բացման արարողությանը: Բելգիայում Հայաստանի դեսպանության նոր շենքը գտնվում է եվրոպական թաղամասում, գնվել է կառավարության հատկացրած 280 հազար եվրոյով, գումարի մյուս մասը վարկով վերցվել է բելգիական բանկերից մեկից, պետք է մարվի 15 տարում: Վերջին 13 տարիներին Հայաստանի դեսպանությունը տեղավորվել էր Բրյուսելի «Հայ տանը»: