ԼՈՍ ԱՆՋԵԼԵՍ, 2 ՆՈՅԵՄԲԵՐ, ԱՐՄԵՆՊՐԵՍ: Լոս Անջելեսում փորձ Է արվում համախմբվել հայկական ընտրովի մարմին հիմնելու գաղափարի շուրջ:
Նախաձեռնող խմբիՙ հայ համայնքին ուղղված երեկ հրապարակված նամակում ասված է, որ Հայաստանից հետո հայության թվով երկրորդը համարվող Լոս Անջելեսում (այս պնդումը ճիշտ չէ-խմբ.) ընտրովի մարմնի նպատակն է լինելու ներկայացնել ընդհանուր համայնքի շահերը:
«Սփյուռքահայությունը, որն, ըստ էության, հայության ամենահզոր ներուժն է, անտեսվում է: Ոմանք համայնքներն անվանում են «գաղութ» ստորացուցիչ բառով, վերջերս էլ, թերթերից մեկի բնորոշմամբՙ գետտո: Եկել է գաղութի եւ գետտոյի ճիրաններից մեր ձայնը լսելի դարձնելու ժամանակը», ասված է նամակում:
Հեղինակները գտնում են, որ սփյուռքահայ համայնքում ապրող յուրաքանչյուր հայՙ անկախ իր կուսակցական, կրոնական եւ սոցիալական պատկանելությունից, կարող է ժողովրդի քվեն ստանալով` ընտրվել եւ առաջարկվող կառույցի մաս կազմել:
Նամակը Լոս Անջելեսի հայությանը կոչ է անում համախմբվել այս գաղափարի շուրջ. «Ստեղծվել է նախաձեռնող խումբ, որի դռները բաց են գործի հաջողությամբ շահագրգռված ցանկացած հայորդու առջեւ», նշված է ուղերձում:
Տեղի հայերի մի մասը ոգեւորված է այս գաղափարով, ոմանք էլ կարծում են, որ սա կարող է պարզապես մեկով ավելացնել հայկական կազմակերպությունների թիվը: