Սան Ֆրանցիսկոյի եւ ծովածոցի «Մուսա լեռ» հայրենակցական միությունը Մեծ եղեռնի 90-ամյակի կապակցությամբ եւ Մուսա լեռան հերոսամարտում զոհված 18 հերոսների հիշատակին հրապարակել է «Մուսա լեռան պարեղանակներ» խտասալիկը: «Նոր օր» շաբաթաթերթի ներկայացմամբ, այդ խտասալիկով փրկվել են մուսալեռցիների ազգագրական 7 տոհմիկ պարեղանակները, որոնք մշակվել են եւ կպահպանվեն: Իսկ խտասալիկում տեղ գտած 8-րդ երգը մուսալեռցիների հանրահայտ «Կարմիր Ֆըստան հագուծ ի» պարերգն է: Մուսալեռցիների այդ հնավանդ պարեղանակների արձանագրման, մշակման, զարգացման եւ գործիքավորման պատասխանատու գործը վստահվել է վաստակաշատ ստեղծագործող, հմուտ երաժշտագետ Արմեն Մանդակունուն: «Մուսա լեռան պարեղանակները» խտասալիկը հարստացնում է մեր ժողովրդական երաժշտարվեստի գանձարանը:
Գ. Գ.