Աբխազիայի ժողովրդական միասնության ֆորումը հանդես է եկել հայտարարությամբՙ կապված Սուխումի հայկական դպրոցի մոտ Նոր տարվա գիշերը տեղի ունեցած պայթյունի եւ հակահայկական բովանդակությամբ թռուցիկների տարածման դեպքերի հետ: Ֆորումի հայտարարության մեջ մասնավորապես ասվում է, որ փաստը գնահատվում է սադրիչ եւ նպատակ ունի Աբխազիայում ազգամիջյան խնդիրներ բորբոքել եւ ապակայունացնել իրավիճակը:
Ֆորումն անդրադարձել է հունվարի 12-ին Աբխազիայի ղեկավարների հետ հայ համայնքի ներկայացուցիչների հանդիպմանը, մասնավորապես ղեկավարների այն արտահայտություններին, թե տեղի ունեցածում մեղավոր են նրանք, ովքեր նախորդ ընտրությունների ժամանակ ներկա նախագահի թեկնածությանը քվե չեն տվել: Ֆորումը կարծիք է հայտնել, թե Աբխազիայի ղեկավարության նման որակումները ստվեր են գցում Աբխազիայի ազգային համայնքների վրա, ուստի եւ կոչ է արել առաջնորդվել ոչ թե խմբային շահերով, այլ համապետական եւ համազգային խնդիրներով:
Ա. Հ.