Ֆուտբոլի պատմության եւ վիճակագրության միջազգային ֆեդերացիան հրապարակել է աշխարհի 350 ուժեղագույն ակումբների հերթական վարկանիշային ցուցակը: Այն ներառում է վերջին 12 ամիսների ընթացքում ազգային առաջնություններում եւ միջազգային մրցաշարերում թիմերի ցույց տված արդյունքները:
Հայաստանից այդ ցուցակում ընդգրկված են ՀՀ գավաթակիր ու արծաթե մրցանակակիր Աշտարակի «Միկան» եւ բրոնզե մրցանակակիր Երեւանի «Բանանցը»: Որքան էլ որ տարօրինակ է, ցուցակում բացակայում է ՀՀ չեմպիոն «Փյունիկը»: Նախորդ ամսվա համեմատ Հայաստանի երկու ներկայացուցիչներն էլ 10 հորիզոնականով վեր են բարձրացել: «Միկան» 73 գործակցով 266-րդ տեղում է, իսկ «Բանանցը» զբաղեցնում է 329-րդ հորիզոնականը 64 գործակցով:
Աշխարհի ուժեղագույն ակումբների ցուցակը նախկինի պես գլխավորում է Չեմպիոնների գավաթակիր «Լիվերպուլը»: Առաջին հնգյակը պահպանել է դիրքերը: Լավագույն տասնյակում միայն մեկ փոփոխություն է կատարվել: «Մանչեսթր յունայթեդին» փոխարինել է «Յուվենտուսը»: Նախկին Խորհրդային Միությունից ցուցակում տեղ են զբաղեցրել 11 հանրապետությունների 33 ակումբներ: Բացակայում են Ղազախստանի, Տաջիկստանի, Թուրքմենստանի եւ Ղըրղզստանի ներկայացուցիչները: Ցուցակում բոլորից շատՙ 6 թիմ է ընդգրկված Ուկրաինայից: Ռուսաստանն ու Էստոնիան ներկայացված են չորս թիմերով: 100 ուժեղագույն ակումբների թվում ընդգրկված են Մոսկվայի ԲԿՄԱ-ն (5-րդ տեղ), Դոնեցկի «Շախտյորը» (21-րդ), Մոսկվայի «Լոկոմոտիվը» (50-րդ), Կիեւի «Դինամոն» (58-րդ), Սանկտ Պետերբուրգի «Զենիթը» (60-րդ) եւ Դնեպրոպետրովսկի «Դնեպրը» (91-րդ):
Լավագույն տասնյակն այսպիսի տեսք ունի (փակագծերում նշված է նախորդ ցուցակում զբաղեցրած տեղը):
| 1(1). «Լիվերպուլ» Անգլիա | 319 |
| 2(2). «Ինտեր» Իտալիա | 309 |
| 3(3). «Բավարիա» Գերմանիա | 297 |
| 4(4). «Միլան» Իտալիա | 267 |
| 5(5). ԲԿՄԱ Ռուսաստան | 254 |
| 6(7). «Լիոն» Ֆրանսիա | 248 |
| 7(7). «Սան Պաուլու» Բրազիլ. | 246 |
| 8(9). «Արսենալ» Անգլիա | 241 |
| 9(6). «Էյնդհովեն» Հոլանդիա | 240 |
| 10(16). «Յուվենտուս» Իտալիա | 239 |
ԱՇՈՏ ՀԱՅՐԱՊԵՏՅԱՆ