Այս օրերին Երեւանի «Արարատն» ու «Բանանցը» հերթական ուսումնամարզական հավաքն են անցկացնում արտերկրումՙ շարունակելով նոր մրցաշրջանի նախապատրաստությունը: «Արարատը» հանգրվանել է Սոչիում, որտեղ մարզումները կշարունակվեն մինչեւ մարտի 12-ը: Պարապմունքներին զուգընթաց թիմի մարզիչները ֆուտբոլիստների պատրաստվածության մակարդակն ստուգում են ընկերական հանդիպումներում: Մենք արդեն տեղեկացրել էինք, որ արարատցիներն առաջին խաղում ուժերը չափել էին Ղազախստանի Կոկշետաու քաղաքի «Օկժետպես» թիմի հետ, որը հանդես է գալիս երկրի բարձրագույն խմբի առաջնությունում: Խաղն ավարտվել էր ոչ-ոքի (0-0): Երկրորդ հանդիպումն արարատցիներն անցկացրին Ռուսաստանի Ուրեյ քաղաքի «Էներգետիկի» հետ: Այդ խաղում մարզիչներն առաջին խաղակեսում ասպարեզ էին հանել թիմի երիտասարդ ֆուտբոլիստներին, որոնց չհաջողվեց դիմակայել մրցակցի գրոհներին: Դրանցից երկուսն ավարտվեցին «Արարատի» դարպասի գրավումով: Թեեւ ընդմիջումից հետո խաղադաշտ մտան հիմնական կազմի ֆուտբոլիստները, սակայն հաշվի մեջ փոփոխություն մտցնել չհաջողվեց:
Մինչեւ ուսումնամարզական հավաքի ավարտն արարատցիները եւս երկու խաղ կանցկացնեն Ռոստովի համանուն թիմի փոխարինող կազմի եւ «Կրասնոդար-2000»-ի հետ: Մարտի 12-ին թիմը կվերադառնա Երեւան: Ինչպես տեղեկացանք «Արարատի» գլխավոր մարզիչ Սուրեն Բարսեղյանից, ներկայումս թիմում փորձաշրջան են անցնում Ռոստովից հրավիրված Գրիգորի եւ Ալեքսեյ Դմիտրիչենկո եղբայրները: Հարազատ կոլեկտիվ է վերադարձել բրազիլացի կիսապաշտպան Ռենատո դե Մորայեսը: Եվս մեկ բրազիլացի ֆուտբոլիստ մոտ ժամանակներս կհամալրի «Արարատը»:
«Բանանցը» մարզումներն անցկացնում է Կիպրոսում: Ակումբի նախագահ Սարգիս Իսրայելյանից տեղեկացանք, որ թիմը ստուգողական երեք հանդիպում է անցկացրելՙ բոլորում էլ զիջելով մրցակիցներին: Առաջին խաղում «Բանանցը» պարտվել է Կիեւի «Դինամո-2»-ին, հաջորդ խաղում զիջել ԱՄՆ-ի «Կոլումբոսին» (1-2): Այդ խաղում «Բանանցից» գոլը խփել է Արամ Հակոբյանը: Ընկերական երրորդ հանդիպումում հայ ֆուտբոլիստները պարտվել են Լիեպայայի «Մետալուրգին» (1-3): Աչքի է ընկել «Բանանցի» լեգեոնական Անդրեյ Բուրդիանը: Այսօր «Բանանցն» ուժերը կչափի Շվեդիայի «Հելսինկբորգի» հետ: Մարտի 10-ին թիմը կվերադառնա Երեւան:
ԱՇՈՏ ՀԱՅՐԱՊԵՏՅԱՆ