Եվրոպայի առաջնությանը նախապատրաստվող Հայաստանի հունահռոմեական ոճի ըմբշամարտի հավաքականի համար ուժերի լավ ստուգատես կլինի Բուլղարիայի Պեռնիկ քաղաքում ապրիլի 1-2-ը կայանալիք միջազգային մրցաշարը: Մեր երիտասարդ ըմբիշներից գորգ դուրս կգան գյումրեցիներ Տիգրան Գեւորգյանը (54 կգ) եւ Խոսրով Մելիքյանը (60 կգ), երեւանցիներ Վահրամ Խաչատրյանը (57 կգ), Արման Պարյանը (66կգ), Արսեն Ջուլֆալաքյանը (74 կգ) եւ էջմիածնեցի Արթուր Շահինյանը (84 կգ): Մրցաշարը հնարավորություն կընձեռի հավաքականի գլխավոր մարզիչ Արմեն Բաբալարյանին ստուգելու իր սաների պատրաստվածության աստիճանը, կազմավորելու թիմը, որը կշարունակի նախապատրաստվել առաջիկա պատասխանատու մրցումներին: Բուլղարիայում ըմբիշների գոտեմարտը սպասարկող մրցավարների թվում կլինի նաեւ միջազգային կարգի մրցավար Գեւորգ Հարությունյանը:
ԱՇՈՏ ՀԱՅՐԱՊԵՏՅԱՆ