«Ազգի» նախորդ համարներից մեկում մեր հրապարակմանն ի պատասխան ՀՀ-ում ԱՄՆ դեսպանատան հասարակայնության հետ կապերի բաժնից, ինչպես եւ ակնկալում էինք, մեր ոչ պաշտոնական հաղորդումը հաստատող պարզաբանումներ ստացանք:
Մեր տեղեկությունը վերաբերում էր ներգաղթային արտոնագրերին առնչվող հարցազրույցներին, որոնք առ այսօր կատարվում էին Թբիլիսիում կամ Մոսկվայում:
Այսուհետեւ (սկսած 2006 թվականի փետրվարից) ՀՀ-ում ԱՄՆ դեսպանատունը զբաղվում է նաեւ ՀՀ քաղաքացիներին ԱՄՆ ներգաղթային վիզաներ տրամադրելու հարցերով: Ներգաղթային վիզաները տրվում են աշխատանքային կամ ընտանեկան հիմքերով, ԱՄՆ քաղաքացու, մշտական օրինական բնակչի կամ գործատուի կողմից: Ընտանեկան ներգաղթային վիզայի բարդությունն այն է, որ չափազանց մեծ հերթի պատճառով մարդիկ երկար տարիներ պիտի սպասեն իրենց մերձավորների հետ միավորվելու երջանկությանը:
Ապրիլից ՀՀ-ում ԱՄՆ դեսպանատունը սկսեց նաեւ ամենամյա վիճակախաղում շահածների դիմումների քննությունը: Վիճակախաղում շահելը դեռեւս երաշխիք չէ ներգաղթային արտոնագիր ստանալու համար: Այս ծրագիրը նույնիսկ շահելուց հետո էլ որոշակի պահանջներ է առաջադրում: Անցած տարի «Գրին քարտով» մշտական բնակության իրավունք շահածների տվյալների վերաբերյալ դեսպանատունն առայժմ ամբողջական տեղեկություններ չունի:
Կ. Դ.