«Բոլորիս թվում է, թե Չարենցի մասին նոր խոսք ասել հնարավոր չէ, բայց սա նոր խոսք է, գրականագիտական նոր ուղղություն: Ռոբերտ Դավթյանի այս գրքերը Չարենցին եւ Իսահակյանին նոր լույսով տեսնելու հնարավորություն են տալիս»: Գրականագետ, արվեստագետ Ռոբերտ Դավթյանի նոր հրատարակությունների շնորհանդեսի ժամանակ հրատարակությունների մասին ասաց Ավետիք Իսահակյանի անվան գրադարանի տնօրեն Հասմիկ Կարապետյանը:
Հիշյալ գրադարանում երեկ ընթերցողին եւ արվեստի ու գրականության մարդկանց ներկայացվեցին Ռոբերտ Դավթյանի 2005 թ-ի չորս նոր հրատարակությունները` «Չարենցը եւ երաժշտությունը», «Չարենցը եւ արվեստը», «Ավետիք Իսահակյան. Ճարտարապետություն կերպարվեստ», «Հայոց մեծ եղեռնը հայ գրականության մեջ» գրքերը: Ի դեպ, Չարենցի մասին հեղինակն ունի 6 գրքեր, որոնք 30 տարիների աշխատանքի արդյունք են:
Առաջին երկու գրքերում ներկայացված են Չարենցի երաժշտական աշխարհը, նրա ստեղծագործությունները երաժշտության մեջ, Չարենցի առնչությունները արվեստի հետ, հեղինակի խոսքերովՙ «Չարենցը արվեստի մասին, Չարենցը արվեստում»: Գրականության եւ արվեստի համաձուլվածք կարելի է համարել արվեստաբանի գրքերը, որոնք, ներկաների բնորոշմամբ, գրականագիտության մեջ նոր ուղղություն են:
«Պետք է խոստովանեմ, որ Ռոբերտ Դավթյանը Չարենցի պոեզիային անդրադարձել է պատասխանատվության մեծ զգացումով, պոեզիայի եւ երաժշտության զուգադրման ճիշտ մոտեցումով: Փաստորեն Ռ. Դավթյանը դառնում է գրականության եւ արվեստների համադրման պատմության հիմնադիր հեղինակը: Առաջին փորձը լինելով այս գիրքը` «Չարենցը եւ արվեստը», լուրջ ներդրում է բանասիրության եւ արվեստի պատմության մեջ: Լուսավորչի կանթեղի նման այն կբոցավառվի Չարենցի հավերժական կյանքում», Դավթյանի աշխատանքը գնահատում է կոմպոզիտոր Տիգրան Մանսուրյանը:
«Ավետիք Իսահակյան. Ճարտարապետություն, կերպարվեստ» գիրքը նվիրված է բանաստեղծի ծննդյան 130-ամյակին: Հրատարակությունն անդրադառնում է Իսահակյանի ճարտարապետության եւ կերպարվեստի վերաբերյալ գիտական գործունեությանը: Չորրորդ գրքում ներկայացված են հայոց մեծ եղեռնի արտահայտումները գրականությունում:
ԳՈՀԱՐ ԳԵՎՈՐԳՅԱՆ