Արդեն երկրորդ տարին անցկացվում է «Ազգային պատկերասրահ» երաժշտական փառատոնը: Նախաձեռնությամբ մշակույթի նախարարության եւ ազգային պատկերասրահի, «Հայաստան» համահայկական հիմնադրամի հովանու ներքո այս տարվա փառատոնը նվիրված է Հայաստանի ազգային պատկերասրահի 85-ամյակին: Երեկ երեկոյան պատկերասրահի որմնանկարների դահլիճում կայացած փառատոնային առաջին համերգը նվիրված էր Հայոց մեծ եղեռնի զոհերի հիշատակին: Բացման հանդիսությանը խոսք ասացին պատկերասրահի տնօրեն Փարավոն Միրզոյանը, կոմպոզիտոր Էդվարդ Միրզոյանը, մշակույթի նախարարի ուղերձն ընթերցեց փոխնախարար Կարինե Խոդիկյանը:
Հանդիսավարըՙ Սարգիս Նաջարյանը, տեղեկացրեց համերգային ծրագրում կատարված փոփոխության մասին: Նախապես հայտարարված Էդ. Միրզոյանի «Սիմֆոնիա լարայինների եւ լիտավրների համար» ստեղծագործությանը փոխարինեց Միրզոյանի «Թեմա եւ վարիացիաները» (փոխադրում լարային քառյակից) գործըՙ ֆիլհարմոնիայի ղեկավարությանՙ լիտավրներ (գոսեր) չտրամադրելու պատճառով:
Համերգը բացվեց Էդուարդ Հայրապետյանի «Հայր մեր» հրաշալի գործով, ապա հնչեցին Արվո Պյարտի «Cantus»-ը, Միրզոյանի հիշյալ ստեղծագործությունը եւ «Շուշանիկ» քնարական պատկերը:
Բեմում Հայաստանի պետական կամերային նվագախումբն էրՙ Արամ Ղարաբեկյանի դիրիժորությամբ, որի մասին «Բոստոն գլոբի» երաժշտական քննադատ Ռիչարդ Դայերն ասել է. «Նա կարող է նվագախմբին ոգեշնչել այնպես, որ նրանից ստանա այն, ինչ ցանկանում է»:
Մ. Բ.