«ԱԶԳ» ՕՐԱԹԵՐԹ

ԼԻԼԻԹ ՄԿՐՏՉՅԱՆԸ ՇԱՐՈՒՆԱԿՈՒՄ Է ՀԱՂԹԱՐՇԱՎԸ

Շախմատի Ռուսաստանի ակումբային առաջնությունում իրենց հաջող մրցելույթներն են շարունակում հայ շախմատիստները: Մրցաշարի առաջատար «Ուրալի» կազմում իր հերթական հաղթանակը տոնեց Վլադիմիր Հակոբյանը` պարտության մատնելով Շոմոեւին: «Ուրալը» վստահ հաղթանակ տոնեց «Մերիայի» նկատմամբ (4,5-1,5) եւ 12 միավորով շարունակում է միանձնյա գլխավորել մրցաշարային աղյուսակը: Հակոբյանը 6 պարտիաներում վաստակել է 3,5 միավոր:

Իրենց անպարտելի խաղերի շարքն են շարունակում «Յուժնի Ուրալում» հանդես եկող Սմբատ Լպուտյանն ու Կարեն Ասրյանը, որոնք խաղաղ դաշն կնքեցին համապատասխանաբար Էլյանովի ու Մոիսեենկոյի հետ: «Յուժնի Ուրալից» միակ հաղթանակը տոնեց Կուռնոսովը` իր թիմին 2 միավոր պարգեւելով: «Յուժնի Ուրալը» 9 միավորով 4-րդ տեղում է: Նշենք, որ Ասրյանը բոլոր 7 պարտիաներն էլ ավարտել է ոչ-ոքի, իսկ Լպուտյանը 6 մրցախաղերից 2-ում հաղթել է, չորսում խաղաղ դաշն կնքել:

«Տոմսկ-400-ի» կազմում Լեւոն Արոնյանն առաջին խաղատախտակի վրա ոչ-ոքի ավարտեց պարտիան Բորիս Գելֆանդի հետ: «Տոմսկ-400-ը» 3,5-2,5 հաշվով առավելության հասավ «Թերմոստեպսի» նկատմամբ եւ 10 միավորով 3-րդ տեղում է: Առանց պարտության է հանդես գալիս նաեւ ՖԻՆԷԿ-ի կազմում ընդգրկված Սերգեյ Մովսիսյանը, որը ոչ-ոքի խաղաց Նայդիչի հետ: ՖԻՆԷԿ-ը պարտություն կրեց «Յունիլայնից» (2-4): Թիմն անհաջող է հանդես գալիս` վաստակելով ընդամենը 4 միավոր: Իրենց պարտիաները խաղաղ ելքով ավարտեցին նաեւ Սերգեյ Գրիգորյանցն ու Արթուր Գաբրիելյանը:

Պարզապես հիանալի է խաղում Լիլիթ Մկրտչյանը, որը պաշտպանում է «Յուժնի Ուրալի» մարզական պատիվը: Լիլիթը 3-րդ տուրից է մասնակցում մրցաշարին եւ մեծ վերելքով է հանդես գալիս: «Նեֆթեքիմի» հետ մրցախաղում նա իր 4-րդ անընդմեջ հաղթանակը տոնեց` պարտության մատնելով Խարաշուտային: «Յուժնի Ուրալը» 3-1 հաշվով հաղթեց «Նեֆթեքիմին» եւ 12 միավորով 2-3-րդ տեղերն է բաժանում ՖԻՆԷԿ-1-ի հետ: Վերջինս ոչ-ոքի ավարտեց հանդիպումը առաջատարի` ABC-ի հետ, որն առաջին միավորը կորցրեց: ABC-ն 13 միավորով շարունակում է միանձնյա գլխավորել աղյուսակը:

Անհաջող է խաղում Նաիրա Մովսիսյանը, որն ընդգրկված է «Դեբյուտի» կազմում: Նա 3-րդ անընդմեջ պարտությունը կրեց, որը 5-րդն էր մրցաշարում: 7 հանդիպումներում Մովսիսյանն իր օգտին ընդամենը 1,5 միավոր է գրանցել:

ԱՇՈՏ ՀԱՅՐԱՊԵՏՅԱՆ