Գործարարները լքում են «Օրինաց երկիրը»
Այլեւս «Օրինաց երկիր» կուսակցության շարքերում չեն եւս երկու գործարար պատգամավորներ: Կուսակցության լրատվական ծառայության տեղեկացմամբՙ Արշակ Մխիթարյանն ու Մելիք Մանուկյանը դուրս են եկել ՕԵԿ պատգամավորական խմբակցությունից եւ կուսակցությունից: ՕԵԿ շարքերից գործարար պատգամավորների հեռանալու պրակտիկան գործարկվեց «Պետական գույքի մասնավորեցման 2001-2003 թթ. ծրագրի կատարողականի» ընդունմանը խմբակցության ոչ միաձայն քվեարկությունից հետո: Հիշեցնենքՙ «ՍԱՍ»-ի Արտակ Սարգսյանը դեմ քվեարկեց, այնուհետեւ հեռացվեց կուսակցությունից: Ապակյա տարաների արտադրությամբ զբաղվող Մելիք Մանուկյանն ու ադամանդագործ Արշակ Մխիթարյանը նույն քվեարկությանը ձեռնպահ էին: ՕԵԿ ղեկավար Արթուր Բաղդասարյանի գնահատականը կտրական էր ու խիստ արտահայտություններով բարձրաձայնված:
Ավելի խիստ է լինելու, ըստ երեւույթին, ամենավերին իշխանության արձագանքը, ավելի շուտՙ պատիժը: ՕԵԿ-ին ցույց է տրվում, որ անհանդուրժելի է նախանշված գծից որեւէ շեղում, անհատական որեւէ կատարում: