Երկու տարի առաջ Հայաստանում բացվեց Կորեայի հանրապետության հյուպատոսարանը եւ գլխավոր պատվո հյուպատոս ընտրվեց Արմեն Աբրահամյանը: Հիմնադրման առաջին իսկ օրերից հյուպատոսության եւ Հոյ Ջեոն Մոո Սոոլ Հայաստանի ֆեդերացիայի միջեւ սերտ համագործակցություն հաստատվեց: Երեկ Հայաստանում Կորեայի Հանրապետության գլխավոր պատվո հյուպատոս Արմեն Աբրահամյանն ու դեսպանատան աշխատակիցները այցելեցին մայրաքաղաքի «Հայաստան» ՄՄ ըմբշամարտի մարզադպրոց, որտեղ Հոյ Ջեոն Մոո Սոոլ Հայաստանի ֆեդերացիան նրանց պատվին միջոցառում էր կազմակերպել: Պատվավոր հյուրերի առջեւ ցուցադրական ելույթներով հանդես եկան Հոյ Ջեոն Մոո Սոոլ մարզադպրոցի սաները:
Հոյ Ջեոն Մոո Սոոլը արեւելյան մարտարվեստի հնագույն ձեւերից է, որը հիմնադրվել է 994 թ. Կորեայում: Այս մարտարվեստը ներառում է ձեռքի եւ ոտքի ավելի քան 7000 հնարքներ: Մարզաձեւն աշխարհում պաշտոնական գրանցում է ստացել 1960 թ. եւ այժմ տարածված է 38 երկրներում: Երկու տարին մեկ անցկացվում են աշխարհի առաջնություններ: Հայաստանն ԱՊՀ-ի առաջին եւ միակ երկիրն է, որտեղ 1999 թ. վերջերին հիմնադրվեց մարզաձեւի ֆեդերացիան եւ մարզադպրոցը: Ֆեդերացիայի հիմնադիրներն էին ՀՀ զինվորական դատախազ Գագիկ Ջհանգիրյանը, նրա տեղակալ Արմեն Հարությունյանը, Ավան եւ Նոր Նորք համայնքների առաջին ատյանի դատարանի նախագահ Սամվել Ուզունյանը, Ֆինլանդիայի կրկնակի չեմպիոն, սեւ գոտի Սամվել Վարդանյանը: Ցուցադրական ելույթներից հետո ընթերցվեց ՀՀ-ում Կորեայի Հանրապետության դեսպան Կիմ Դե Սոբի ողջույնի խոսքը: Հայաստանի Հանրապետությունում Կորեայի Հանրապետության հյուպատոսության եւ իր անունից միջոցառման մասնակիցներին ողջունեց նաեւ Արմեն Աբրահամյանը: Նա իր շնորհակալությունը հայտնեց մարզաձեւի հանրապետական ֆեդերացիայի հիմնադիրներին, շնորհավորեց մարզչին եւ նրա սաներինՙ ցուցադրած վարպետության համար եւ խոստացավ հնարավորության սահմաններում աջակցել Հայաստանում Հոյ Ջեոն Մոո Սոոլի տարածմանն ու զարգացմանը: Արմեն Աբրահամյանը հուշամեդալներ եւ պատվոգրեր հանձնեց մարզադպրոցի առավել աչքի ընկած սաներին:
ԱՇՈՏ ՀԱՅՐԱՊԵՏՅԱՆ