«ԱԶԳ» ՕՐԱԹԵՐԹ

ՄԵՐ ԿԱՅՔԷՋԻ ՀՅՈՒՐԸ ԱԺ ՊԱՏԳԱՄԱՎՈՐ ԽԱՉԱՏՈՒՐ ԱԼԲԵՐՏԻ ՍՈՒՔԻԱՍՅԱՆՆ Է

<0000000027.jpg>

Հովակիմյան, Երեւան 2006- 13-06, IP : 203.108.246.106

- Ձեր կենսագրության մեջ նշված է, որ դուք երկու գյուտի համահեղինակ եք: Կարելի՞ է իմանալ, կոնկրետ ի՞նչ գյուտեր են դրանք: Խնդրում եմ չընդհանրացնել պատասխանըՙ միայն դրանց բնագավառն ասելով:

Շնորհակալություն

- Այո, ես երկու գյուտի համահեղինակ եմ: Այս գյուտերը վերաբերվում են միկրոալիքային սարքերին: Սարքը նախատեսված է գերբարձրհաճախականային կամ միկրոալիքային էլեկտրամագնիսական տատանումներ ստանալու համար: Այս սարքը կարող է կիրառվել միկրոալիքային վառարաններ պատրաստելիս: Կարծում եմ, որ նպատակահարմար չէ թերթի կայքէջում անդրադառնալ գյուտերի մանրամասն նկարագրությունը։ Եթե իսկապես դրանք ձեզ հետաքրքրում են, ապա կարող եք ուսումնասիրել ՀՀ Արտոնագրային Վարչության կողմից տրված թ.թ. 848 եւ 849 արտոնագրերը, որոնք մանրամասն կերպով տալիս են գյուտերի տեխնիկական նկարագրությունը:

Տիգրան, 2006-13-06 02:35:43 , IP: 82.179.230.30

- Պարոն Սուքիասյան,

Չե՞ք գտնում, որ Հայաստանում ստեղծված է քաղաքական իրավիճակ, երբ մի խումբ մարդկանց բացարձակ իշխանությունը կարող է մեկուսացնել Հայաստանը սփյուռքից։ Արդյո՞ք չեք կարծում, որ պետք է մշակել Հայաստան-Սփյուռք ընդհանուր կառավարման համակարգ։

- Համաձայն եմ, որ սփյուռքի դժգոհությունը միգուցե լինի, եւ որ պետք է համակարգվի ընդհանուր ծրագիր, ընդհանուր հայեցակարգ, ընդհանուր զարգացմանը նպաստող պարտադիր ծրագիր, որը պետք է ձեւավորվի լուրջ մասնագետների կողմից:

Շահնուր Մինասյան, Բելգիա, Անտվերպեն , 2006-13-06 01:18:51 , IP: 84.193.142.152

- Պարոն Սուքիասյան,

Գաղտնիք չէ, որ դուք մտերիմ ազգակցական կապերի մեջ էիք Վանո Սիրադեղյանի հետ, որի հորդորներով եւ աջակցությամբ հայտնվեցիք տեսանելիության դաշտում եւ որն այժմ բացակայում է հայ քաղաքական դաշտից: Հաշվի առնելով, որ հայաստանյան քաղաքական իրականությունը մեծամասամբ պայմանավորված է անձերի գործոնով, այդ առումով հանդիսանալով անկայուն եւ անկանխատեսելի համակարգ, ինչպե՞ս կարողացաք պահել ձեր դիրքերը բիզնեսի եւ քաղաքականության այդ բարդ հանգույցում:

Շնորհակալ եմ եւ ակնկալում եմ անկեղծ եւ ոչ «հերթապահ» պատասխան։

- Նախ առաջինը, Վանո Սիրադեղյանն իմ ընկերն է եւ դուք ինքներդ պատասխանում եք այն հարցին, որին ես պետք պատասխանեի: Ասելով, որ պահեցիք ձեր դիրքերը, կարծում եմ, որ տեսանելիության դաշտում հայտնվելը, այդքան էլ Վ. Սիրադեղյանի հետ չէր կապված: Ինքնուրույնության շրջանակներն ավելի մեծ էին եւ կային։ Մենք արդեն մեզ դրսեւորել էինք որպես տնտեսվարող սուբյեկտ, երբ դեռ Վ. Սիրադեղյանը քաղաքականության մեջ չէր, այլ գրող էր եւ այդ ժամանակ Վ. Սիրադեղյանին չէինք ճանաչում, նույնպես գործունեություն ենք իրականացրել: Եթե ուզում եք իմանալ, ապա այդ տարիներին, երբ դեռ շարժումը չէր սկսվել, ես եղել եմ գործարանի տնօրեն: Այնպես որ չգիտեմ թե դրա գնահատականը ով պետք է տա, ով պետք է վերլուծի եւ ով պետք է վերջնական արդյունքը հայտնի, այնպես որ ես նույնպես միգուցե սուբյեկտիվ պատասխան եմ տալիս: Լավ կլիներ, որ ավելի տեղեկացված մարդ այդ վերլուծությունը կատարի:

Հայկ Պապյան, Լոս Անջելոս 2006-13-06 13:22:15 , IP: 68.125.27.18

- Պարոն Սուքիասյան,

Եթե դուք ձեռք բերեք «Արմենտելի» բաժնետոմսերը (ցանկալի է, որ հենց Հայաստանից լիներ այդ գործարարը), ինչպիսի՞ փոփոխություններ կարող ենք սպասել այդ բնագավառում:

Երկրորդ հարց

Ձեզ կարող եք արդյո՞ք համարել «անկախ» գործարար:

Եվ երրորդ հարց

Ինչու՞ Հայաստանում չկա որեւէ ընդիմադիր խոշոր գործարար::

Շնորհակալություն

- 1.Կխոսենք արդյունքներից հետո:

2. Անկախ գործարար, այնքանով, որքանով...

3. Ես կարծում եմ, ընդդիմադիր ասածը հայկական իրականության մեջ մի քիչ այլ կերպ պետք է հասկանալ: Նրանք պետք է հարող լինեն, այլ ոչ թե ընդդիմադիր քաղաքական գործիչներ լինեն, պետք է հարեն ընդդիմադիր քաղաքական համակարգին: Հաշվի առնելով, որ Հայաստանում դեռ այդպիսի լուրջ ընդդիմադիր համակարգ չկա, մի գուցե դա է պատճառը, որ գործարարների ինչ-որ մաս չի միանում այդ հատվածին:

Կարապետ, Բելգիա, Բրյուսել 2006-13-06 13:02:44, IP: 195.162.212.149

- Պարոն Սուքիասյան, նախ ողջունում եմ ձեզ: Այսօր մեր հայ քաղաքական-գործարար դաշտում Դուք յուրահատուկ հարգանք եք վայելում հասարակության կողմից: Գիտեմ, որ բարեգործական ծրագրեր եք իրականացնում հասարակության համար, աշխատատեղեր ապահովում: Եվ եթե չեմ սխալվում, դուք մեծ ներդրումներ եք իրականացրել կրթության եւ գիտության բնագավառում։ Կոնկրետ մասնաճյուղը չգիտեմ, ուղակի բարձր տեխնոլոգիաների հետ է կապված, եւ խնդրեմ, հարցս այդ կապակցությամբ։

Ի՞նչ նոր ներդրումներ կատարելու մտադրություն ունեք գիտության եւ կրթության ասպարեզում, եթե գաղտնիք չէ: Եվ հնարավոր է , որ ձեզանից ակունք առնելով, մեր մյուս, այսպես ասած, քաղաքական բիզնեսմեն պատգամավորներն էլ փորձեն ներդրումներ կատարել կարեւորագույն այդ ասպարեզում: Եվ մենք բոլորս, ովքեր բնակվում եք արտերկրում, վերադառնանք մեր հայրենիք եւ մեր ունեցած եվրոպական փորձն ու գիտելիքները հաղորդենք մեր երկրին:

Նախապես շնորհակալ եմ:

- Հայաստանի համար եվրոպական փորձը շատ է պետք։ Այսօր դրա կարիքը զգացվում է։ Այսօր այդպիսի մարդիկ, որ տարբեր եվրոպական կազմակերպություններում են աշխատում, փորձ են ձեռք են բերել, ծանոթ են ամբողջ ենթակառուցվածքներին, ծանոթ են եւ այդ ոճին, արհեստավարժությունն ունեն արդեն: Կարծում եմ, որ նրանք շատ կարեւոր են Հայաստանի համար, եւ միայն այդ կադրերի առկայության դեպքում կարելի է առավել զարգացում ապահովել Հայաստանի տնտեսության համար:

Կրթության եւ գիտության մասին

Դպրոցական եւ բուհական կրթության բնագավառում, եթե մարդիկ համակարգչային ծրագրերի հետ աշխատելու փորձ չունեն, որը ես շատ եմ կարեւորում, ապա մենք նրանց օգնում ենք, որպեսզի մեր կազմակերպած լսարաններում, մեր կազմակերպած համակարգերում նրանք մասնակցեն եւ գիտելիքներ ու հմտություններ ձեռք բերեն, որպեսզի կարողանան համակարգչային ծրագրերի հետ աշխատել: Մոտ ժամանակներս ուզում ենք լեզվի հետ կապված նմանատիպ լսարաններ ստեղծել: Այդ լսարանները այժմ վերանորոգվում են, համակարգիչներ են տեղադրվում: Դասավանդող ուսուցիչները վարձրատրվում են մեր կողմից:

Սյունի18, Երեւան, 2006-13-06 12:30:11 , IP: 10.15.87.228 84.235.229.48

- Պարոն Սուքիասյան

Կարելի՞ է իմանալ , թե ինչու եք պատգամավոր դարձել, եթե այդքան հաջող բիզնես ունեք, եւ կարելի՞ է իմանալ, թե ինչքան հարկ եք վճարում պետությանը, եթե իհարկե վճարում եք:

- Իհարկե վճարում եմ։ 2005 թվականին, կարող եմ ասել, որ մոտավորապես 18-19 մլն. դոլարին համարժեք դրամ եմ վճարել:

Այսքանը Ձեզ:

Արամ Թովմասյան, տ.գ.թ., Երեւան, Հայաստան, 2006-14-06, 10.13.33 IP unknown 80.86.233.182

- Հարգելի պարոն Սուքիասյան,

Համաձայն Ձեր կենսագրական տվյալների, Դուք ինֆորմատիկայի միջազգային ակադեմիայի թղթակից անդամ եք: Ինչպե՞ս եք պատկերացնում Հայաստանում ինֆորմացիոն տեխոնոլոգիաների զարգացման հեռանկարները որպես գերակա ճյուղ: Ինչո՞վ եք Դուք նպաստում դրան:

Համաձա՞յն եք, որ «Արմենտելի» մենաշնորհը հիմնական խոչընդոտներից է այս ոլորտի զարգացման համար: Եթե հաղթեիք «Արմենտելի» գնման մրցույթում, կընդունեի՞ք ինտերնետ եւ բջջային կապերի ոլորտների ազատականացման անհրաժեշտությունը:

- Ճիշտն ասած, ցանկությունս այն է, որ դա բացի գերակա ճյուղ լինելուց, հարկային պարտավորությունների շրջանակում նույնպես ազատ լինի եւ հարկային պարտավորությունները այդտեղ նվազագույնի բերվի;

«Արմենտելի» մենաշնորհին շատ դեմ եմ եւ կարծում եմ այս առքուվաճառքից հետո կամ հենց այս վաճառքից հետո, այդ մենաշնորհը կվերանա:

Վրեժ Հարությունյան , Մոսկվա, Ռուսաստան 2006-14-06 10:05:30 , IP: 172.16.5.54 80.240.100.130

- Ողջույն պարոն Սուքիասյան :

Ձեր գործարար եւ քաղաքական գործունեության կարճ ժամանակահատվածում, մեր բոլորի աչքի առաջ մեծ աճ ունեցաք: Չնայած ճնշումներին, նավից-նավ չփախաք: Դա ձեր մարդկային արժեքների, առաջին հերթին ազնվության եվ արժանապատվության ապացույցն է: Իհարկե, գործարարի նպատակը շահն է: Բայց երբ շահույթը, ինչպես դուք, ներդնում եք երիտասարդ սերունդ դաստիարակելու եւ հայրենիքը շենացնելու համար, կարելի է միայն հպարտանալ նման գործարարով:

Պատկերացնելով, թե ինչքան մարդիկ են ատամ կրճտացնում Ձեր նկատմամբ, ցանկանում եմ Ձեզ հաջողություն եւ առողջություն:

- Շնորհակալություն , պ-րն Հարությունյան

Ֆլորա, Ատլանտա, ԱՄՆ , 2006-14-06 08:27:35 , IP: 68.217.68.241

- Պարոն Սուքիասյան,

Ես ավարտել եմ Երեւանի Պետական Համալսարանը։ Հիմա հանգամանքների բերումով ապրում եմ Ատլանտայում եւ այստեղի հայ համայնքի թերթն եմ հրատարակում: Մենք փոքր համայնք ունենք, որտեղ հավաքված են շնորհալի մարդիկ: Սիրով Ձեզ հրավիրում ենք այստեղ:

- Շատ շնորհակալություն

Սամվել, Փարիզ, 2006-14-06 02:33:21 , IP: 213.78.89.161

- Հարգելի պարոն Սուքիասյան, Ինչպես ձեզ հայտնի է, մի քանի օր առաջ ազդարարվեց գյուղական համայնքների զարգացման ծրագիրը, որը պետք է ներկայացվի Հայաստան-Սփյուռք ժողովին: Ի՞նչ եք կարծում, ճիշտ չի լինի, որ Հայաստանի խոշոր գործարարներից ամեն մեկը մի գյուղ վերցնի եւ ֆինանսավորի վերակենդանացման ծրագիրը, մեր սփյուռքահայ բարեկամներից փող ուզելու փոխարեն:

Հարգանքներով` Ս.

- Այո, շատ ճիշտ եք ասում, բայց կարծում եմ, որ ընդհանուր համակարգային մոտեցում պետք է լինի, եւ, այո, առողջացնել է պետք գյուղը: Ես ժամանակին մի ծրագիր ունեի Պրոդիի հետ, արդեն համաձայնության էին եկել, երբ որ նա Եվրոխորհրդում էր, որպեսզի մի գյուղ կամ փոքրիկ քաղաք կամ գյուղական տիպի քաղաք վերցնեին եւ եվրոպական նորմերի բերեին իր բոլոր ենթակառուցվածքներով, իր բոլոր տարածքի պահանջներով, կառույցներով, համայնքապետարանով, համայնքով, ամեն ինչով: Դեսպանի հետ համաձայնության էինք եկել, բայց վատ չի լինի, որ Հայաստանի կառավարությունը նույնպես նման մի մոտեցում ցուցաբերի, մենք նույնպես կաջակցենք եւ կմտնենք այդ ծրագրի մեջ կամ մաս կկազմենք:

Վազգեն Զաքարյան , Վաշինգտոն, 2006-14-06 01:33:34 , IP: 128.164.34.103

- Ես կարծում եմ, որ դուք եղած գործարարներից տարբերվում եք աչքաբացությամբ: Մյուսներն իրենց քթից ու գյուղից այն կողմ տեսած չկան: Այդտեղ հայերի գործարար լինելու միֆն է կերտված, բայց իրականում մենք իրար հոշոտելու վարպետներ ենք: Նույնիսկ այստեղ, ԱՄՆ-ում ռուսական կոչված խանութների տերերը հիմնականում հրեաներ ու վրացիներ են: Վաճառում են ամեն ինչ նախկին սովետական ապրանքներից, ներառյալ նաեւ Վրաստանի 20-25 տեսակի գինիներ(շատ թանկ- $ 20-25), մուրաբաներ եւ նույնիսկ ծիրանի վրացական կոմպոտ: Հայկական ոչ մի արտադրանք չկա: Ինչպես տեսնում եմ Հայաստանը չի արտադրում, միայն ներմուծում է: Դուք էլ գործում եք միայն սպասարկումներում եւ բանկային ոլորտներում: Լավ, իսկ ո՞վ պետք է արտադրի: Ես պանդուխտ եմ դարձել այդտեղի «բեսպրեդելի» պատճառով: 1995-ին խորհրդարանային ամենամեծ կեղծարարությունները սկսվեցին այն ժամանկ դեռ անհայտ, բայց հիմա Հայաստանի համար 1 գործարար դարձած Գագիկ Ծառուկյանից: Նրա հետ կապված որեւէ իլյուզիա ես չունեմ: Նա 100 վերցրածից 49-ը իր գրպանն է դնելու, 50-տալու է վերեւ, 1-ը բաժանելու է ժողովրդին որպես ողորմություն:

Դուք ինչպե՞ս եք պատկերացնում արտադրող Հայաստանի սկիզբը: Դուք նստում-ելնում եք հայկական բիզնեսի շրջապատի հետ: Չե՞ք կարծում, որ նրանց վայրենությունից դուրս բերելը նաեւ ձեր ֆունկցիան է:

- Հայաստանը շատ արտադրանքներ ունի, շատ հյութեր ունի, եւ Հայաստանի վերամշակման արտադրությունը ավելի զարգացած է, քան հարեւան պետությանը, որ դուք նշում եք։ Ուղղակի իրենց մոտ իրացման համակարգը ստեղծվել է ազգությամբ հրեա գործարարների միջոցով: Ես կարծում եմ, որ դուք նույնպես որպես, հայ, եւ մնացած հայերը, որոնք այդտեղ ազդեցություն ունեն, իտալական տարբերակը կկիրառեք։ Ինչպես իտալացիներն են իրենց ցանկացած ապրանքը գովաբանում, մարդկանց հետ խոսելու ժամանակ, մատնացույց անում եւ հյուրասիրում մարդկանց, որպեսզի այդ մարդկանց կապեն իրենց ապրանքներին, ինչպես ամբողջ աշխարհում այդպես գովազդել են պիցան եւ մնացած ապրանքները, այդպես էլ հայերը պետք է գովազդեն հայկական ապրանքները, իսկ հայ արտադրողներն էլ պետք է իրենց արտադրանքի մակարդակը բարձր պահեն։

Աննա, Երեւան, 2006-14-06 01:15:56, IP: 213.175.162.191 213.175.169.4

- Դուք անձնական մեծ հմայքի տեր մարդ եք։ Ո՞րն է մարդկային այդ հմայքի գաղտնիքը:

- Շնորհակալություն, չգիտեմ

Նազենի Աբրահամյան Բեյրութ, Լիբանան, 2006-14-06 01:14:04 , IP: 213.175.162.191 213.175.169.4

- Ձեր բիզնեսմենի համբավը հասած է մինչեւ Բեյրութ։ Օր մը արաբ վաճառական մը հարցուց մեզի ձեր մասին, մենք հպարտ զգացինք, որ հայ մեծահարուստ մարդուն գիտեն նաեւ օտարները: Չե՞ք մտածեր կապ պահպանել Լիբանանի հետ: Լիբանանը ձեր բիզնեսի գծով շատ առաջացած է, եւ կկարծենք, թե օգտակար կլլա մեր հայրենիքին:

Շնորհակալություն

- Շնորհակալություն, եթե առաջարկներ լինեն, խնդրեմ, մենք ուրախ ենք քննարկելու:

Աթուր Այվազյան, Շվեյցարիա, Ցյուրիխ , 2006-13-06 23:21:56 , IP: 85.180.50.35

- Ողջունում եմ Ձեզ պարոն Սուքիասյան, իմ հարցը ձեզ հետեւյալն է

Չե՞ք կարծում, որ Հայաստանում ծննդաբերությունը բարձրացնելու համար պետք է օրակարգ մտցվի ամուսնալուծությունների արգելման հարցը, նորաստեղծ ընտանիքների աջակցության հարցը պետական խոշոր գումարների աջակցմամբ եւ որոշ աջակցություն տրվի այդ ընտանիքիներին: Այսինքն, որքան երեխաների թիվը բարձր է ընտանիքում, այնքան ավելի մեծ արտոնություններ կստանան այդ ընտանքիները պետության կողմից։ Երկրորդ հարցն այն է, որ Հայաստանում անհրաժեշտ է ունենալ 5 բջջային օպերատոր, 12 ինտերնետ պրովայդեր եւ մեկ անկախ ազգային հեռախոսային ընկերություն Հայաստանում բարձր կապ ապահովելու նպատակով: Ցանկանում եմ «Արմենտելի» բաժնետոմսերի վաճառքում «ՍԻԼ Գրուպին» հաղթանակ: Նախօրոք շնորհակալություն:

- Այո, համաձայն եմ ձեր բոլոր ասածների հետ, բայց ուղղակի պետությունը մի քիչ այլ ձեւերով, իր հնարավորությունների շրջանակներում, սոցիալապես անապահով խավին առաջնահերթ ծննդաբերությունը բարձրացնելու մեխանիզմներ մտածի, դրանք շահագրգռի եւ որոշակի պայմաններ ստեղծելը նորաստեղծ ընտանիքներում, բայց արգելել ամուսնալուծությունը, ես չեմ կարծում, որ արդյունքի կհասնենք: Թող ավելի շատ ամուսնանան, թող շատ երեխաներ ունենան։ Մենք կձգտնեք եւ ձգտելու ենք տարիների ընթացքում, ամեն անգամ այսպես ասած նպաստել, որպեսզի քիչ ամուսնալուծվեն, շատ երեխաներ ունենան եւ կայուն ընտանքիներ լինեն:

Շնորհակալություն

Արմեն Դուլյան , Հայաստան, Երեււան 2006-14-06 16:53:11 , IP: 217.113.7.149

- Որտե՞ղ է Վանո Սիրադեղյանը:

- Չգիտեմ, որտեղ է Վանո Սիրադեղյանը

Արմեն Դուլյան, Հայաստան, Երեւան, 2006-14-06 16:55:08 , IP: 217.113.7.149

- Որքա՞ն է կազմում ձեր կարողությունը եւ ո՞ր տեղում եք Հայաստանի մեծահարուստների ցուցակում:

- Դեռ այդպիսի ինստիտուտ, այդպիսի կազմակերպություն չկա Հայաստանում, որը կարողանա գնահատի եւ կարողանա հաշվարկի: Դրա համար ոչ մեկը չի կարող ասել, միգուցե մոտավոր ասեն:

Արա, Ֆրանսիա , 2006-15-06 02:21:40 , IP: 84.103.58.247

- Բարեւ հարգելի Սուքիասյան,

Հետագայում ինչպե՞ս եք զարգացնելու Ձեր բիզնեսը :

- Ի՞նչ է նշանակում, թե ինչպես ենք զարգացնելու մեր բիզնեսը հետագայում:

Աննա, Հայաստան , 2006-15-06 03:01:41 , IP: 203.108.246.106

- Հայտնի է, որ մարդու կյանքը լցնում է կամ ֆիզիկական գոյապայքարը կամ նպատակները: Առաջինը ձեզ չի սպառնում, ի՞նչ կասեիք երկրոդի մասին, ի՞նչով է ձեր կյանքը իմաստավորված, ինչի՞ն եք դուք ձգտում, ո՞րն է ձեր իդեալը:

Սիրով ...

- Հայաստանը տեսնել շատ զարգացած, չափից ավելի զարգացած, ամենազարգացած երկրներից մեկը, իսկ հայ ժողովրդինՙ ամենաբարկեցիկ կյանքը:

Ս. Սարգսյան, Երեւան , 2006-15-06 11:27:20 , IP: 83.217.231.83

- Պարոն Սուքիասյան, ինչպես է ձեզ հաջողվում լինել հաջողակ բիզնեսմեն` ինչ-որ տեղ մնալով ընդդիմադիր: Դուք այն բացառիկ մարդկանցից եք, ովքեր 1998թ. իշխանափոխությունից հետո չդավաճանեցին Լեւոն Տեր-Պետրոսյանին ու Վանո Սիրադեղյանին: Ավելին, անգամ ԱԺ-ում հաճախ եք հայտարարում, որ Լեւոնն ու Վանոն անկրկնելի մարդիկ են: Մինչդեռ բոլորս էլ գիտենք այսօրվա իշխանություններն իրենց առաջին թշնամին համարում են Լեւոնին ու Վանոյին: Չե՞ք վախենում, որ նրանց կողքին եք կանգնած:

- Ոչ չեմ վախենում: Շնորհակալություն

Ավետիս Ավետիսյան, 2006-15-06 14:33:37 , IP: 212.73.74.5 85.195.145.206

- Պարոն Սուքիասյան,

Հայաստանում գործարարները կարո՞ղ են իրենց հայացքները, այդ թվում քաղաքական հայացքները ազատ արտահայտել եւ դրա համար տնտեսական պատժամիջոցների չարժանանալ, օրինակ` նախագահական ապարատի կողմից:

Շնորհակալություն

- Նայած ինչ հայացք:

Հայկ Ասատրյան, Երեւան, Հայաստան , 2006-15-06 14:55:01 , IP: 83.217.226.132

- Պարոն Սուքիասյան ,

Որպես մեղմ ասած հաջողակ բիզնեսմեն, ե՞րբ հայկական բիզնեսը դուրս կգա ստվերից եւ ի՞նչ է պետք անել դրա համար առաջնահերթ կերպով :

- Առաջնահերթ կերպով քաղաքական կամք է պետք, եւ քաղաքական կամքը կարող է թելադրել դա: Բայց ամենկարեւոր խնդիրը կարծում եմ ոչ թե ստվերից դուրս գալն է, այլ բոլորի մի մակարդակի վրա գտնվելը հավասար պայմաններում: Բոլորը պետք հավասար պայմաններում լինեն:

Սուրեն Պետրոսյան, Երեւան, 2006-15-06 17:39:03 , IP: 10.3.79.122 84.235.229.48

- Հարգելի պարոն Սուքիասյան,

Ինձ հետաքրքրում է մի հարց: Պատրա՞ստ եք արդյոք որոշակի օգնություն տրամադրել զոհված ազատամարտիկների երեխաների օգնության համար:

- Բոլոր ժամանակներում եւ միշտ պատրաստ ենք եղել, միշտ էլ տրամադրել ենք։ Ուղղակի դա կենտրոնացված ձեւով պետք է արվի, որովհետւ հազար մարդ հազար ձեւի փաստաթղթեր է բերում։ Կարծում եմ, որ կենտրոնացված հիմնադրամի միջոցով ավելի ճիշտ է:

Նուբար Ասլանյան, Հայֆա, Իսրայել 2006-14-06 IP: 87.68.50.133 87.68.50.133

- Հարգարժան պ-րն Սուքիասյան,

Ուզում եմ Ձեզ միամիտ հարց տալ: Սեպենք, թե ես Վրթանես Փափազյանի (վստահ եմ, որ գիտեք իրեն) "Ուզուն ախմախն եմ", արդ`

Հարց

Մեր վերջը գիտենք: Ասացեք խնդրեմ` ինչ պիտի լինի Ձեր` պատգամավորների (ազգի խիղճը, դեմքը, պատիվը, ինչու չէ նաեւ փողերը) վերջը: Միայն խնդրում եմ մեզ հետ չհամեմատվեք, քանզի "մեր ջուրը ուրիշ ջրեն է" չնայած ասում են ժողովուրդն է Ձեզ ընտրում` մեջն ինչ` կացնի կոթն էլ փայտից է...

Հարգանքներով Նուբար Ասլանյան շատ հեռվից

- Դուք երեւի ինձանից լավ գիտեք:

Հասմիկ Գուրջինյան, Հայաստան Երեւան , 2006-14-06 13:54:24 , IP: 10.5.1.124 84.235.229.48

- Մայրաքաղաքի Սիլաչի թաղամասի հետ կապված ի՞նչ շինարարական ծրագրեր ունեք, այն չի կառուցապատվելու, բարեկարգվելու:

- Անպայման, կառուցապատվելու եւ բարեկարգվելու է։

Արա Մարտիրոսյան «Ազգ» օրաթերթ, 2006-14-06, 14:22:29

- Պրն. Սուքիասյան

Տնտեսական հանցագործությունների համար քրեական պատիժ նախատեսող օրենքի նախագծի վերաբերյալ Դուք ի՞նչ տեսակետ ունեք: Ինչու՞ է այն անընդունելի գործարարների համար

Երկրոդ հարցը: Ձեր կարծիքով ներքին շուկայի բարձր կենտրոնացվածությունը եւ գերիշխող դիրքերի առատությունը ինչի՞ հետեւանք է: Այդ իրավիճակն արհեստականորեն է ստեղծվել, թե՞ տնտեսական գործընթացների արդյունքում: Ինչպե՞ս է այն ազդում մեր տնտեսության զարգացման վրա:

Եվ վերջին հարցը պարոն Սուքիասյան,

Դրամի արժեւորման գործընթացը Դուք ինչպե՞ս եք գնահատում որպես գործարար եւ որպես քաղաքացի:

Նախապես շնորհակալություն պատասխանների համար:

- 1. Նախ առաջինը` անընդունելի չէ գործարարների համար։ Անընդունելի է այն հատվածով , որ գործունեություն ծավալողը, որը որ երկար ժամանակ գործունեություն է ծավալում , եւ մի սայթաքում, որեւէ մի սխալ ..... Կամ այնտեղ ամենակարեւորը մի այսպիսի կետ կա` չարամտորեն։ Ո՞վ է տարանջատում, թե որ գործողությունն է չարամտորեն, որըՙ ոչ: Նկատի ունեմ,որ հստակ չի, նորից սովետական երանգներ են երեւում: Բայց ինչ-որ մի ձեւով մենք հոդվածների առումով դրանք հստակեցրեցինք: Խոսքը գնում է չփաստաթղթավորված գործունեություն ծավալելու, ուղղակի գրանցվելու եւ փաստաթուղթ վաճառելու, ուղղակի գրանցվելու եւ պետությանը ու այլ տնտեսվարող սուբյեկտներին վնասներ հասցնելու մասին: Նպատակային է այդ գործունեությունը, նա ոչ թե գործարար է, նա ոչ թե գործունեություն է ծավալում, այլ... միայն նրանց կլինի քրեական պատիժ: Իսկ խոշոր չափինը, ես կարծում եմ իմ կողմից առաջին-երկրորդ ընթերցման ժամանակ առաջարկություն կլինի, որ շեմը բարձրացնել մինչեւ 25 միլիոնի: Եվ կարծում եմ, որ տնտեսական խախտումների դեպքում, տնտեսական սխալի դեպքում մարդը պետք է տնտեսական պատժամիջոց կրի, նկատի ունեմ տույժ, տուգանք եւ ավելի մեծ գումարներ, ոչ թե մարդուն պետությունը նստեցնի եւ նրա համար էլ գումարներ ծախսի: Խոսքը սրա մասին է:

2.Ես կարծում եմ ինչ որ ունենք, մեր քաղաքական եւ տնտեսական ընդհանուր վիճակի արդյունք է։ Նկատի ունեմ, որ դրանք կան, ինչ-որ մի ձեւով մարդիկ, ճկուն են գտնվել եւ հասկացել են , որ ինչ ձեւով պետք է իրենց դրսեւորեն եւ շուկայում ունեն գերիշխող դեր։ Կամ ուղղակի դրանք եղել են սովետական ապրանքներ, որոնք նախկինում , հասարկության հիշողության մեջ եղել են , հետագայում ճիշտ մենեջմենթի արդյունքում ուղղակիորեն կարողացել են դա պահպանել, կամ ինչ որ մարդկանց օգնության արդյունքում են կարողացել, կամ ինչ-որ մի տեղ կարողացել խուսափել հարկերից, այնպես որ դա միանշանակ, մի կետով ասել հնարավոր չէ:

3. Շատ տրամաբանական եւ շատ հանգիստ եմ վերաբերվում:

Տիգրան Ավագյան , Հայաստանից, այժմ Միացյալ Նահանգներում ուսանող 2006-16-06 12:05:34 , IP: 217.113.9.80

- Հարգելի պարոն Սուքիասյան

Շնորհակալություն եմ ցանկանում հայտնել Ձեզ Երեւանում սովորելու ընթացքում ինձ կրթավճարի հարցում օգնելու համար: Այժմ ընդունվել եմ Միացյալ Նահանգների ամենալավ բուհերից մեկը: Ցավոք, այս անգամ դուք հրաժարվեցիք ինձ օգնել: Կցանկանայի իմանալ, ինչպես կարելի է սովորելու համար վարկ վերցնել:

Ես խոստանում եմ թերթի բազմահազար ընթերցողների առջեւ, որ անպայման կվերադարձնեմ ավարտելուց հետո: Ինչու՞ ամերկացի իմ հասակակիցը պետք ունենա այդպիսի հնարավորություն, իսկ ես` ոչ: Ես անպայման Հայաստան եմ վերադառնալու ու փորձելու եմ աշխատանքի մտնել որպես Ձեր ընկերություններից մեկի ներկայացուցիչ արտասահմանում։ Եւ պետք է ներկայացնեմ իմ հայրենքն այնտեղ, որ իմանան, որ մենք ոչնչով չենք զիջում իրենց:

Դրա համար այսօր ես Ձեր օժանդակության կարիքն ունեմ:

- Կապվեք իմ օգնականի հետ, հասկանանք,թե ինչ եք ուզում ընդհանուր առմամբ: