Այս տարվա մայիսի 25-ին «Գործադուլ Ախթալայի լեռնահարստացուցիչ ֆաբրիկայում» վերնագրով տեղեկության մեջ հայտնել էինք, որ վերոնշյալ ֆաբրիկայում գործադուլ է տեղի ունեցել, որի պատճառը մի քանի ամիս չվճարված աշխատավարձերի պարտքերն էին: Այդ առթիվ խմբագրություն էր զանգահարել Ախթալայի ԼՀԿ երեւանյան գրասենյակի տնօրեն Վարդան Պապյանը եւ հերքել ինչպես գործադուլի, այնպես էլ չվճարված աշխատավարձերի մասին մեր ունեցած տեղեկատվությունը: Ախթալայի ֆաբրիկայի ներկայացուցչի այս պարզաբանումները ներկայացրել էինք մայիսի 31-ին («Ֆաբրիկան շարունակում է աշխատել»):
Վերոնշյալ երկու հրապարակումների կապակցությամբ երեկ հետաքրքրական նոր տեղեկություններ ստացանք Ախթալայից: Համաձայն այդ տեղեկությունների, մայիսի 25-ի մեր հրապարակման մեջ նշված փաստերը աշխատավարձերի վճարման ուշացումների մասին համապատասխանում էին իրականությանը, քանի որ հրապարակման հաջորդ օրը ֆաբրիկայի աշխատակիցները ստացել են ուշացած աշխատավարձերը: Այդ փաստը, բնականաբար, հաճելիորեն զարմացրել է ֆաբրիկայի աշխատակիցներին, որոնք, ճիշտ է, չէին դիմել գործադուլի, բայց նման մտադրություններ են ունեցել: Ամեն դեպքում, ուրախալի է, որ մեր հրապարակումը դրական արդյունք է տվել եւ նպաստել ֆաբրիկայի աշխատակիցների եւ ղեկավարության միջեւ գոյություն ունեցող խնդիրների հաղթահարմանը:
Ա. Մ.