Հունիսի 23-ին Հայաստանում Ռուսաստանի դաշնության դեսպանատանը տեղի կունենա «Մենք կարդում, խոսում եւ երգում ենք ռուսերեն» 3-րդ միջբուհական փառատոնի պարգեւների հանձնման արարողությունը` մասնակցությամբ բուհական ռեկտորների, ռուսաց լեզվի ամբիոնների վարիչների, ուսանողներին փառատոնին նախապատրաստող դասախոսների:
ՌԴ արտակարգ եւ լիազոր դեսպան Պավլովը նրանց կպարգեւատրի Հայաստանում ռուսաց լեզվի պահպանման եւ նրա հեղինակությունը բարձրացնելու` Ռուսաստանի դեսպանատան պատվոգրերով:
Հիշեցնենք, որ մրցույթը տեղի է ունեցել մայիսի 20-ին ռուս-հայկական սլավոնական պետհամալսարանում` Հայաստանի եւ Լեռնային Ղարաբաղի ավելի քան 25 բուհերի ուսանողների միջեւ, այդ թվում նաեւ` օտարերկրյա: Հաղթողներ ճանաչվեցին Մ. Հերացու անվան բժշկական համալսարանը` «Ասմունք եւ երգ», Գյումրու Մ. Նալբանդյանի անվ. մանկավարժական ինստիտուտը` «Ասմունք» եւ ռուս-հայկական սլավոնական համալսարանը` «Խոսք» անվանակարգերում:
Համալսարանի դասախոս, «Սլավոնական տուն» Հ/Կ-ի համանախագահ եւ փառատոնի նախաձեռնող Նոնա Գուստովայի խոսքերով, ռուս հայրենակիցներին օգնության ծրագրի շրջանակներում ՌԴ կառավարության համագործակցությամբ այս տարի Ռուսաստանի տարբեր բուհեր ոչ մրցութային կարգով սովորելու կուղարկվեն Հայաստանի դպրոցների շրջանավարտներ: Իսկ Հայաստանի ռուսական Հ/Կ-ների անդամների 10-14 տարեկան երեխաներ ՌԴ դեսպանության միջոցներով ամառային արձակուրդները կանցկացնեն Հանքավանում: Այդ ընթացքում Հայաստանի դպրոցների 30 բարձր դասարանցիների հնարավորություն կտրվի այցելել Մոսկվա:
Տ. ՀՈՎՀԱՆՆԻՍՅԱՆ