Այսօր Շվեյցարիայի Նիոն քաղաքում տեղի կունենա չեմպիոնների լիգայի եւ ՈւԵՖԱ-ի գավաթի խաղարկության նախնական փուլերի մասնակիցների վիճակահանությունը: Հայտնի կդառնան չեմպիոնների լիգայի մրցաշարում Հայաստանի չեմպիոն «Փյունիկի» եւ ՈւԵՖԱ-ի գավաթի խաղարկությունում «Միկայի» ու «Բանանցի» մրցակիցները:
ՀՀ չեմպիոն Երեւանի «Փյունիկը» մրցաշարը կսկսի որակավորման առաջին փուլից: Այս փուլում հանդես կգան 22 թիմեր, որոնք ըստ իրենց վարկանիշի բաժանվել են երկու խմբի: «Փյունիկը» գտնվում է ցածր գործակից ունեցող 11 ակումբների շարքում: Վիճակահանությամբ մեր չեմպիոնին կարող է բաժին ընկնել հետեւյալ 11 ակումբներից մեկը: Դրանց թվում են Սլովենիայի «Գորիցան», ֆիննական «Մյուպան», Կիպրոսի «Ապոլոնը», Բոսնիայի «Շիրոկի Բրիեգը», Իսլանդիայի «Հաֆնարֆյորդուրը», Լատվիայի «Մետալուրգը», մոլդովական «Շերիֆը», վրացական «Սիոնին», Լիտվայի «Էկրանասը», Մալթայի «Բիրկիրկարան» եւ Մակեդոնիայի «Ռաբոտնիչկին»:
Որակավորման առաջին փուլի հանդիպումները կկայանան հուլիսի 11-12-ին եւ 18-19-ին: Առաջին փուլում հաջողության հասած 11 թիմերը կմիանան երկրորդ փուլի 17 մասնակիցներին: Այս փուլի վիճակահանությունը եւս կկայանա այսօր: Երկրորդ փուլի հանդիպումները նախատեսված են հուլիսի 25-26-ին եւ օգոստոսի 1-2-ին: Այդ փուլի հաղթողներին երրորդ փուլում կմիանան ավելի բարձր վարկանիշ ունեցող 18 թիմերը: Այդ փուլի հաղթողները ուժեղագույն 16 ակումբների հետ իրավունք կստանան հանդես գալու խմբային մրցաշարում:
ՈւԵՖԱ-ի գավաթի խաղարկության նախնական փուլում հանդես կգան 70 թիմեր, որոնք աշխարհագրական սկզբունքով բաժանվել են 3 խմբի` Հյուսիսային, Հարավ-Միջերկրածովային եւ Կենտրոնական-Արեւելյան: Նշենք, որ առաջին փուլում նույն երկրի ներկայացուցիչներն իրավունք չունեն միմյանց հետ հանդիպելու: Հայաստանի ներկայացուցիչները` «Միկան» ու «Բանանցն» ընդգրկվել են Կենտրոնական-Արեւելյան խմբում ցածր վարկանիշ ունեցող թիմերի ցանկում: Վիճակահանությամբ մեր թիմերին կարող են բաժին ընկնել Շվեյցարիայի «Բազելը» եւ «Յանգ Բոյզը», Սլովակիայի «Արտմեդիան» ու «Սպարտակը», լեհական «Զագլեմբեն», հունգարական «Վիդեոտոնն» ու «Ույպեշտը», մոլդովական «Զիմբրուն» ու «Նիստրուն» եւ վրացական «Ամերին»:
Առաջին փուլի հանդիպումները տեղի կունենան հուլիսի 13-ին եւ 27-ին: Առաջին փուլի 35 հաղթողները հաջորդ փուլում կմիանան 29 ակումբներին, որոնց թվում կլինեն Ինտերտոտոյի գավաթի խաղարկությունում հաջողության հասած 11 թիմերը: Երկրորդ փուլի հանդիպումները տեղի կունենան օգոստոսի 10-ին եւ 24-ին:
ԱՇՈՏ ՀԱՅՐԱՊԵՏՅԱՆ