Ռումինիայում հայկական եկեղեցու առաջնորդարանը բաց նամակ հղելով երկրի մշակույթի եւ կրոնական հարցերի նախարար Ադրիան Իորգուլեսկուին, պահանջել է եկեղեցուն վերադարձնել Բուխարեստում գտնվող «Աննա Մելիք Հաուս» շինությունը, որտեղ տեղակայված է Թեոդոր Պալադի թանգարանի գլխավոր վարչությունը, հաղորդում է «Արմինյն միրոր-սփեքթեյթր» շաբաթաթերթի հունիսի 17-ի համարը:
Ծխական համայնքի պնդումներովՙ այդ շինությունը թագավորական հրամանով 1924 թվից պատկանում է Հայ առաքելական եկեղեցուն: «Աննա Մելիք Հաուսը», որը 1967-ին բռնագրավվել է պետության կողմից, Բուխարեստի ամենահին շինությունն է (կառուցվել է 1760-ին) եւ դասվում է Ռումինիայի պատմական հուշարձանների թվին: Ըստ նախարարության խոսնակի, պետությունը օրինական ձեւով է տիրացել այդ կառույցին չորս տասնամյակ առաջ:
Հարցը վճռաբեկ դատարանում քննարկման առարկա է դարձել 2000 թվականից: