Մոսկվայում` Կոմպոզիտորների տան մեծ դահլիճում անցկացվել է հայ կոմպոզիտոր Ստեփան Ռոստոմյանի 50-ամյակին նվիրված հեղինակային երեկո: Ռուսաստանի հայերի «Երկրամաս» թերթի վկայությամբ, Ռոստոմյանի երաժշտությունը կատարվում եւ ձայնագրվում է ողջ աշխարհում: Նրան երաժշտություն են պատվիրում այնպիսի հանրահայտ կատարողական կոլեկտիվներ, ինչպիսիք են «Լոնդոնյան սիմֆոնիետան» եւ «Մոդեռն» համույթը:
Ռոստոմյանի խոսքերով, իր ստեղծագործական խնդիրներից մեկը Հայաստանի հոգեւոր երաժշտության քրիստոնեական ավանդույթի եւ Արեւմուտքի կոմպոզիցիայի տեխնիկայի շաղկապումն է: Նա իրեն համարում է ոչ այնքան կոմպոզիտոր, որքան տարածիչ, որի խնդիրն է ստույգ նոտագրել ինչ-որ տեղ արդեն գոյություն ունեցող ստեղծագործությունը:
Երեկոյի ընթացքում բրիտանացի հայտնի դիրիժոր Դեւիդ Դեւիսի ղեկավարությամբ Մոսկվայի ժամանակակից երաժշտության համույթը կատարել է Ռոստոմյանի 3-րդ եւ 4-րդ կամերային սիմֆոնիաները, «Հրեշտակների երգեցողությունը» եւ ճապոնացի միջնադարյան բանաստեղծների խոսքերով ստեղծված վոկալ շարքը: