«Գլոբալ-հայ տեղեկատվական ծառայությունից» ստացված հաղորդագրությամբ Լիբանանի Հայկազյան համալսարանի պրեզիդենտ Պոլ Հայդոստյանն իր շնորհակալական խոսքն է հղում բոլոր նրանց, ովքեր իրենց զորակցությունն են հայտնում Լիբանանի ժողովրդին աղոթքներով, առաջարկություններով եւ տարբեր տեսակի օժանդակություններով: Միաժամանակ նա իր մտահոգություններն է հայտնում տեղի ունեցածի կապակցությամբ: «Չորս կողմը ավերակներ են, խանութների դարակների վրայից անհետացել են ապրանքները, բանկերից` դոլարները: Հարավային գյուղական վայրերում դրությունն ավելի ծանր է: Ոչ բժշկական օգնություն կա, ոչ մթերք: 500 հազար մարդ տեղահանվել է քաղաքի ներսում: Մոտ 100 հազարը մեկնել է Սիրիա: Հայկական ավետարանչական քոլեջը ապաստան է տվել մոտ 75 հոգու: Մեզ մոտ գտնվող նախկին իրավաբանական ֆակուլտետի շենքը տրամադրվել է հարյուրավոր ընտանիքների, որոնց մեծ մասը նյարդայնացած եւ հուսահատ վիճակում է: Մի քանի օրից բոլոր օտարերկրացիները կլքեն երկիրը: Ասում ենՙ Երկրորդ աշխարհամարտից ի վեր ներկա էվակուացումն իր չափերով ամենամեծՆ է:
Լիբանանցիներից շատերի կարծիքով, դրան հետեւելու են առավել ուժգին ռմբակոծումներ», գրում է նա, հույս հայտնելով, որ ինչպես նախկինում, այս անգամ եւս այդ փոքր երկիրը նորից կհառնի փյունիկի նման:
«Շարունակեք աղոթել մեզ համար», վերջում հորդորում է Հայկազյանի պրեզիդենտ Պոլ Հայդոստյանը:
Հ. Ծ.