Բրազիլիայում Հայաստանի գլխավոր հյուպատոսության, Հայաստանի մշակույթի նախարարության եւ Սան Պաուլոյի մշակույթի քարտուղարության նախաձեռնությամբ սեպտեմբերի 19-24-ը «Սան Պաուլո մշակութային կենտրոնում» տեղի կունենա հայկական ֆիլմերի շաբաթ: Հայաստանի անկախության 15-րդ տարեդարձին նվիրված միջոցառումը կրում է «Արարատ. Հայաստանի եւ սփյուռքի կինովարպետներ» խորագիրը: Արտգործնախարարությունից ստացված հաղորդագրությունը տեղեկացնում է, որ ֆիլմերի շաբաթվա ընթացքում Բրազիլիայի հանդիսատեսին կներկայացվեն Սերգեյ Փարաջանովի, Վիգեն Չալդրանյանի, Հարություն Խաչատրյանի, Ալբերտ Մկրտչյանի, Ռուբեն Քոչարի ստեղծագործությունները, ինչպես նաեւ Անրի Վեռնոյի, Ատոմ Էգոյանի եւ Ռոբերտ Քեշիշյանի ժապավենները` 11 կինոնկար: Բրազիլացիների առաջարկով կցուցադրվի նաեւ «Իմ Սարդարապատ» երաժշտական ֆիլմը:
Նույն օրերին մեր երկրի անկախության տարեդարձին նվիրված միջոցառումների շարքում հիշյալ կենտրոնում կբացվի նաեւ բրազիլահայ երիտասարդ լուսանկարիչ Նորայր Շահինյանի «Հայաստան. նախնիներիս երկիրը» անվանումով ֆոտոցուցահանդեսը, ուր կցուցադրվեն երեք տասնյակ մեծադիր գործեր այն 10 հազար լուսանկարներից, որոնք լուսանկարիչը կատարել է 2004 թ. Հայաստանում:
Գ. Գ.