Կբացվի ֆուտբոլի 15 ամառային դպրոց մարզերում
Նախորդ երեք տարիներին դանիական CCPA կազմակերպության եւ ՀՖՖ-ի միջեւ ստեղծված համագործակցության արդյունքում հնարավոր դարձավ մեծ ուշադրություն դարձնել մասսայական ֆուտբոլի մարզիչների միջազգային կրթական ծրագրերով հայ մարզիչների որակավորման խնդրին: Յուրաքանչյուր տարի 224 մարզիչ` Վրաստանում, որտեղ գտնվում է դանիական կազմակերպության տարածաշրջանային ներկայացուցչությունը, մասնակցել է հիշյալ կրթական ծրագրերով անցկացվող տեսական եւ գործնական պարապմունքներին, ստանալով համապատասխան որակավորում:
Շնորհիվ Հայաստանի ֆուտբոլի ֆեդերացիայի եւ «Բաց զվարճալի ֆուտբոլ» ծրագրի երեւանյան գրասենյակի գործունեության, այս տարի հնարավոր դարձավ մասսայական ֆուտբոլի մարզիչների որակավորման տեսական եւ գործնական պարապմունքներով հագեցած կրթական ծրագիրն անցկացնել Երեւանում, որին մասնակցում են 160 մարզիչ` այդ թվում 80 մարզիչ Վրաստանից, 80-ը` Հայաստանի տարբեր մարզերից:
Հուլիսի 20-ից առ այսօր հնարավոր է դարձել իրականացնել ամենատարբեր տեսական պարապմունքներ, ինչպես նաեւ կատարել գործնական վարժություններ «Փյունիկ» ակումբի մարզաբազայում: Այդ առթիվ տպագրվել են նաեւ համապատասխան դասագրքեր հայերեն լեզվով, մարզչական ուղեցույցներ, առաջադրանքներ եւ այլն: