Ռուսաստանի Դաշնության գերագույն դատարանը Անվտանգության դաշնային ծառայության աջակցությամբ հաստատել է այն 17 ահաբեկչական կազմակերպությունների ցանկը, որոնց գործունեությունն արգելվում է Ռուսաստանում:
ԱԴԾ միջազգային ահաբեկչության դեմ պայքարի վարչության պետ, գեներալ-մայոր Յուրի Սապունովն այս կապակցությամբ «Ռոսիյսկայա գազետա» թերթին տված հարցազրույցում ասել է, որ նման ցանկերը կազմվում են ըստ 3 գլխավոր չափանիշների:
Առաջին չափանիշը ՌԴ սահմանադրական կարգը բռնությամբ, զենքի ուժով, ահաբեկչական մեթոդներով փոխելու գործողություններն են:
Երկրորդը Հյուսիսային Կովկասում կապն է անօրինական զինված կազմավորումների եւ ծայրահեղական մյուս կառույցների հետ:
Երրորդ չափանիշը միջազգային ընկերակցության կողմից ահաբեկչական կազմակերպության ճանաչված խմբավորումների անդամ լինելն է:
Սապունովի խոսքերով, ցանկում նշված բոլոր 12 կազմակերպություններն այս կամ այն կերպ կապված են «Մուսուլման եղբայրներ» ահաբեկչական խմբավորման ծայրահեղական թեւի հետ:
Ցանկում պաղեստինյան «Համասի» եւ լիբանանյան «Հզբոլլահի» բացակայությունը Սապունովը բացատրում է նրանով, որ այդ խմբավորումներն ահաբեկչական են համարվում ոչ բոլոր պետություններում: Երկրորդՙ դրանց գործունեությունը միտված չէ ՌԴ սահմանադրական կարգի տապալմանը, եւ դրանք կապված չեն հյուսիսկովկասյան ծայրահեղականների հետ:
Ընդսմին ԱԴԾ-ն տեղեկություններ ունի, որ Բասաեւը եւ Խաթաբը փորձել են «Համասին» եւ «Հզբոլլահին» մասնակից դարձնել Չեչնիայի ռազմական գործողություններին, խոստանալով փոխարենը Մերձավոր Արեւելք գրոհայինների ուղարկել ձմռանը, «երբ Չեչնիայում կռվելը դժվար է»:
Իրաքում ռուս դիվանագետների սպանության պատասխանատվությունն ստանձնած «Մոջահեդների խորհրդի» բացակայությունը Սապունովը բացատրում է նրանով, որ ԱԴԾ-ն հավաստի տվյալներ չունի այդ կազմակերպության գոյության վերաբերյալ: Օպերատիվ տեղեկությունների համաձայն, այդ «խորհուրդն» իրաքյան ծայրահեղական մի քանի կազմակերպությունների համակարգիչ մարմինն է: