ՀՖՖ նախագահ Ռուբեն Հայրապետյանի հրավերով երեկ երեկոյան կարճատեւ պաշտոնական այցով Երեւան ժամանեց նախկինում հանրահայտ ֆրանսիացի ֆուտբոլիստ, ներկայումս Ֆրանսիայի ֆուտբոլի ֆեդերացիայի փոխնախագահ, ՖԻՖԱ-ի եւ ՈւԵՖԱ-ի գործադիր կոմիտեների անդամ Միշել Պլատինին, որն ինչպես հայտնի է, իր թեկնածությունն է առաջադրել հաջորդ տարի կայանալիք ՈւԵՖԱ-ի նախագահի ընտրություններում: «Զվարթնոց» օդանավակայանից նա մեկնեց Ավան եւ Քանաքեռ-Զեյթունՙ մասնակցելու այդ համայնքներում ՈւԵՖԱ-ի «Հեթ տրիկ» ծրագրով կառուցված արհեստական փոքր խաղադաշտերի բացման հանդիսավոր արարողություններին: Միշել Պլատինիին պատիվ էր տրվել կտրելու կարմիր ժապավենը: Պատվավոր հյուրին անձամբ տեսնելու էին եկել մոտակա թաղամասերի շենքերի բնակիչները: Նախ ողջույնի խոսքով ներկաներին դիմեց ՀՖՖ նախագահ Ռուբեն Հայրապետյանը, նշելով, որ մեր համար մեծ պատիվ է նման լեգենդար ֆուտբոլիստին Հայաստանում հյուրընկալելը եւ նման արարողությանը մասնակցելը: Ողջույնի խոսք հղեց նաեւ Քանաքեռ-Զեյթունի թաղապետ Արայիկ Քոթանջյանը: Այնուհետեւ խոսքը տրվեց Միշել Պլատինիին, որն իր հակիրճ խոսքում հետեւյալը նշեց. «Շատ ուրախ եմ Հայաստան այցելությանս համար, նաեւ որ մասնակցում եմ այս հաճելի արարողությանը: Առաջին անգամն եմ Հայաստանում եւ զգացված եմ ջերմ ընդունելությունից: Ուրախ եմ այստեղ տեսնել այսքան երեխաներ, որոնք անչափ սիրում են ֆուտբոլը: Նման դաշտերի կառուցումը կնպաստի ֆուտբոլի զարգացմանը Հայաստանում: Հայազգի շատ ֆուտբոլիստներ ժամանակին մեծ աջակցություն են ցույց տվել Ֆրանսիայի հավաքականին: Ուրախ եմ ՀՖՖ նախագահի հետ իմ հանդիպման համար: Նրա խոսքից հասկացա, որ ինքը ուրախ կլինի, եթե այսօրվա մանուկներից ոմանք ապագայում հանդես գան իրենց երկրի ազգային հավաքականում»:
Այնուհետեւ Միշել Պլատինին գնդակներ նվիրեց պատանի ֆուտբոլիստներին: Այցի շրջանակներում այսօր առավոտյան նախատեսված է Միշել Պլատինիի հանդիպումը ՀՀ վարչապետ Անդրանիկ Մարգարյանի հետ, որից հետո նրա պատվին հանդիպում կկազմակերպվի Երեւանի քաղաքապետարանում, որից հետո Պլատինին կայցելի Երեւանի պատմության թանգարան: Իսկ ժամը 11.30-ին «Արմենիա Մարիոթ» հյուրանոցում կկայանա Միշել Պլատինիի մամուլի ասուլիսը:
ԱՇՈՏ ՀԱՅՐԱՊԵՏՅԱՆ