«ԱԶԳ» ՕՐԱԹԵՐԹ

ՓՈՓՈԽՈՒԹՅՈՒՆՆԵՐՆ ԱՆՆՇԱՆ ԵՆ

ՖԻՖԱ-ն հրապարակել է ազգային հավաքականների դասակարգման նոր ցանկը, որում նախորդ ամսվա համեմատ փոփոխություններն աննշան են: Հայաստանի ազգային հավաքականը մեկ հորիզոնականով վեր է բարձրացել եւ զբաղեցնում է 104-րդ տեղը:

Եվրո-2008-ի ընտրական մրցաշարում ՀՀ հավաքականի մրցակիցներից ամենաբարձր վարկանիշն ունի Պորտուգալիայի հավաքականը, որը պահպանել է իր դիրքը 8-րդ հորիզոնականում: Լեհերը 805 վարկանիշով 30-րդ տեղում են: Սերբիայի հավաքականը 3 հորիզոնականով վեր է բարձրացել եւ այժմ 33-րդ տեղում է: Բելգիացիները 57-րդ տեղից տեղափոխվել են 55-րդ հորիզոնական, ֆիններն էլ 3 հորիզոնականով առաջընթաց են ունեցել (67-րդ տեղ): Ադրբեջանի հավաքականը 106-րդ տեղում է նախկին 109-ի փոխարեն: Մեր մրցակիցներից ամենացածր վարկանիշն ունեն ղազախները, որոնք զբաղեցնում են 141-րդ հորիզոնականը:

Հետաքրքրական է, որ ցուցակում առաջին 15 տեղերում գտնվող հավաքականներն ամբողջությամբ պահպանել են իրենց առաջատար դիրքերը: Ընդ որում բրազիլացիները 19 կետով բարելավել են իրենց վարկանիշը: Երեք հավաքականներ` Հոնդուրասը, Կանադան եւ Պանաման զգալի հետընթաց են ապրել: Հոնդուրասի հավաքականը վարկանիշը նվազեցրել է 328 կետով եւ նահանջել է 43 տեղով` ներկայում զբաղեցնելով 81-րդ հորիզոնականը: Պանամացիներն էլ 247 կետով են նվազեցրել վարկանիշը եւ 39 տեղով նահանջելով, այժմ 98-րդ տեղում են: Իսկ Կանադայի հավաքականը 205 կետով նվազեցնելով վարկանիշը, 28 հորիզոնականով նահանջել է եւ տեղ է զբաղեցնում 82-րդ հորիզոնականում: Իսկ ամենամեծ առաջընթացն ունեցել է Նամիբիայի ընտրանին, որը 30 տեղով բարձրացել է վեր եւ այժմ 137-րդ հորիզոնականում է:

Ներկայացնում ենք լավագույն տասնյակի եւ նախկին ԽՍՀՄ հանրապետությունների հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ