Ֆուտբոլի Հայաստանի առաջնության 3-րդ շրջանում գերազանց է հանդես գալիս Երեւանի «Արարատը»: Նոր գլխավոր մարզիչ Վարուժան Սուքիասյանի գլխավորությամբ արարատցիները մեկը մյուսի հետեւից պարտության են մատնում մրցակիցներինՙ հավակնելով առաջնության պարգեւներին: Հերթականՙ 4-րդ անընդմեջ հաղթանակը «Արարատը» տոնեց Կապանում, որտեղ հյուրընկալվել էր տեղի «Գանձասարին»: Այդ հանդիպումը սկզբունքային նշանակություն ուներ արարատցիների համար, քանի որ 1-ին շրջանում նրանք Կապանում իրենց դարպասին վերջին րոպեին նշանակված վիճելի 11 մ հարվածով ցավալի պարտություն էր կրել (1-2): Եվ ահա արարատցիները ռեւանշի հասան: Արդեն 2-րդ րոպեին թիմի ավագ Արթուր Մինասյանը բացեց հաշիվը: Մինչեւ ընդմիջում «Գանձասարի» ռմբարկու Արթուր Քոչարյանը վերականգնեց հավասարակշռությունը: Այնուամենայնիվ, արարատցիները հանգստի գնացին հաշվի մեջ առաջ լինելով: 1-ին խաղակեսի վերջին րոպեին դաշտի տերերը սեփական տուգանային հրապարակում խախտեցին կանոնները եւ «Արարատի» նորեկ Նշան Էրզրումյանը հստակ իրացրեց 11 մ հարվածը: Նշանը վերջին 4 հանդիպումներում դաշտից չի հեռանում առանց գոլիՙ իր օգտին գրանցելով 7 գնդակ:
Ընդմիջումից հետո էլ արարատցիների առավելությունը նկատելի էր: Նրանք եւս մի քանի անգամ վտանգավոր պահեր ստեղծեցին մրցակցի դարպասին եւ ի վերջո հանդիպման վերջին րոպեին Վահե Մեհրաբյանը 3-րդ գնդակը խփեց: Այսպիսով, հաղթելով 3-1 հաշվով, «Արարատը» կիճատեց միավորների տարբերությունը 3-րդ տեղում ընթացող «Միկայից» եւ հիանալի հնարավորություն ունի շարունակելու պայքարը մրցանակային տեղերի համար:
Տուրի մյուս խաղում «Հանրապետական» մարզադաշտում մրցեցին առաջնության հետնապահներ «Ուլիսն» ու «Շիրակը»: Առաջին խաղակեսում ավելի ակտիվ էին ուլիսցիները, որոնց կազմում առանձնանում էր Գեւորգ Նռանյանը: Նրանք մի քանի անգամ սպառնացին «Շիրակի» դարպասին, որոնցից մեկն էլ 45-րդ րոպեին ավարտվեց դարպասի գրավումով: Աջ թեւից Նավոյանի փոխանցումը դիպուկ հարվածով եզրափակեց Գոռ Աթաբեկյանը:
Ընդմիջումից հետո շիրակցիները շատ ջանքեր գործադրեցին պարտությունից խույս տալու համար, բայց դա նրանց չհաջողվեց: 61-րդ րոպեին շիրակցի Կարեն Խաչատրյանի հարվածից հետո գնդակը հետ մղվեց դարպասաձողից: Կարող էին հաջողության հասնել նաեւ ուլիսցիները, բայց Հայկ Հակոբյանը նպաստավոր դիրքից վրիպեց: Այսպիսով, «Ուլիսին» վերջապես հաջողվեց հաղթանակ տոնել, սակայն թիմը շարունակում է հանգրվանել աղյուսակի վերջին հորիզոնականում:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 18 | 15 | 2 | 1 | 52-13 | 47 |
| 2. Բանանց | 18 | 12 | 1 | 5 | 42-17 | 37 |
| 3. Միկա | 18 | 10 | 4 | 4 | 25-13 | 34 |
| 4. Արարատ | 18 | 9 | 3 | 6 | 29-23 | 30 |
| 5. Գանձասար | 18 | 5 | 2 | 11 | 18-40 | 17 |
| 6. Կիլիկիա | 18 | 4 | 3 | 11 | 22-40 | 15 |
| 7. Շիրակ | 18 | 3 | 6 | 9 | 11-37 | 15 |
| 8. Ուլիս | 18 | 3 | 1 | 14 | 17-33 | 10 |
Ռմբարկուները
| Արամ Հակոբյան | «Բանանց» | 16 |
| Նշան Էրզրումյան | «Արարատ» | 12 |
| Արսեն Ավետիսյան | «Փյունիկ» | 11 |
| Արմեն Շահգելդյան | «Միկա» | 10 |
| Արթուր Քոչարյան | «Գանձասար» | 9 |
| Էդգար Սաֆարյան | «Արարատ» | 8 |
ԱՇՈՏ ՀԱՅՐԱՊԵՏՅԱՆ