Հայտնի դարձան ՈւԵՖԱ-ի գավաթի խաղարկության առաջին փուլի մասնակիցները: Նրանցից 32-ը որոշվեցին որակավորման 2-րդ փուլի հանդիպումների արդյունքում: Այդ թիմերին կմիանան չեմպիոնների լիգայի որակավորման 3-րդ փուլում անհաջողության մատնված 16 ակումբները, ինչպես նաեւ բարձր վարկանիշ ունեցող եւս 32 թիմերը: Արդյունքում 80 ակումբները 1-ին փուլում կորոշեն այն 40 ուժեղագույններին, որոնք կմասնակցեն խմբային մրցաշարին:
Ինչպես եւ չեմպիոնների լիգայի մրցաշարում, ՈւԵՖԱ-ի գավաթի հերթական փուլում էլ բավական հաջող հանդես եկան ԱՊՀ երկրների թիմերը: Պայքարը շարունակում են Կազանի «Ռուբինը», Տալլինի «Լեւադիան», Զապորոժիեի «Մետալուրգը» եւ Օդեսայի «Չեռնոմորեցը»:
«Ռուբինի» ֆուտբոլիստները Բելառուսի ԲԱՏԷ-ի հետ մրցավեճում պատասխան խաղում էլ հաղթեցին շնորհիվ Դոմինգեսի խփած 2 գոլերի: Նշենք, որ առաջին խաղում էլ ռուսաստանցիները խաղը շահել էին 3-0 հաշվով:
Զապորոժիեի «Մետալուրգը» 3 անպատասխան գնդակ խփեց Քիշնեւի «Զիմբրուի» դարպասը, որի կազմում հանդես են գալիս հայ լեգեոնականներ Գալուստ Պետրոսյանն ու Կարեն Ալեքսանյանը: Իսկ ահա Արտավազդ Քարամյանի թիմը` Բուխարեստի «Ռապիդը» կշարունակի պայքարը: Առաջին խաղում «Ռապիդը» հյուրընկալվելիս 0-1 հաշվով զիջել էր «Սարաեւոյին» եւ կարողացավ սեփական հարկի տակ 2 անպատասխան գնդակ խփել ու հաջորդ փուլի ուղեգիր նվաճել: «Չեռնոմորեցի» հետ խաղում լեհական «Պլոցկի» կազմում գոլի հեղինակ է դարձել հայազգի ֆուտբոլիստ Գեւորգյանը:
Պայքարից դուրս մնացին «Միկայի» եւ «Բանանցի» նախկին մրցակիցներ շվեյցարական «Յանգ Բոյզն» ու վրացական «Ամերին», թեեւ երկու թիմերն էլ համառ դիմադրություն ցույց տվեցին: «Յանգ Բոյզի» մրցակիցը ֆրանսիական «Մարսելն» էր: Շվեյցարիայում գրանցվել էր գոլառատ ոչ-ոքի (3-3): Սեփական հարկի տակ «Մարսելին» եւս չհաջողվեց հաղթել եւ միայն մրցակցի դաշտում խփած գոլերի շնորհիվ ֆրանսիական ակումբն իրավունք ստացավ շարունակելու պայքարը:
«Ամերիի» ֆուտբոլիստներն էլ սեփական հարկի տակ պատվաբեր ոչ-ոքի (2-2) արդյունքի հասան Գերմանիայի «Հերտայի» հետ խաղում: Հիշեցնենք, որ առաջին խաղում հաղթել էին գերմանացիները, որոնք էլ մտան հաջորդ փուլ:
Ներկայացնում ենք կայացած մյուս հանդիպումների արդյունքները (փակագծում նշված են առաջին խաղերի հաշիվները):
| «Էթնիկոս»-«Ռուսելարե» | 5-0 (1-2) |
| «Կայսերիսպոր»-«Տիրանա» | 3-1 (2-0) |
| «Կաունաս»-«Ռանդերս» | 1-0 (1-3) |
| «Սկոնտո»-«Մոլդե» | 1-2 (0-0) |
| «Հապոել»-«Դոմժալե» | 3-0 (1-2) |
| «Լոկոմոտիվ»-«Բնեյ Եգուդա» | 4-0 (2-0) |
| «Վադուց»-«Բազել» | 2-1 (0-1) |
| «Ատվիդաբերգ»-«Բրանն» | 1-1 (3-3) |
| «Գրասհոպերս»-«Ֆեհերվար» | 2-0 (1-1) |
| «Տրաբզոնսպոր»-«Ապոել» | 1-0 (1-1) |
| «Լիտեքս»-«Օմոնիա» | 2-1 (0-0) |
| «Բեյթար»-«Դինամո»Բուխ. | 1-1 (0-1) |
| «Լեւադիա»-«Տվենտե» | 1-0 (1-1) |
| «Օսեր»-ՕՖԿ | 5-1 (0-1) |
| «Սյոն»-«Ռիդ» | 1-0 (0-0) |
| «Բրյուգե»-«Սուդուվա» | 5-2 (2-0) |
| «Վիսլա»-«Մատերսբուրգ» | 1-0 (1-1) |
| «Դերի Սիթի»-«Գրետնա» | 2-2 (5-1) |
| «Նյուքասլ»-«Վենտսպիլս» | 0-0 (1-0) |
| «Բրոնդբյու»-«Ֆլորա» | 4-0 (0-0) |
| «Սլավիա»-«Կարվան» | 0-0 (2-0) |
| «Լանելի»-«Օդենսե» | 1-5 (0-1) |
| «Մարիբոր»-«Պարտիզան» | 1-1 (1-2) |
| «Հայդուկ»-ԲԿՄԱ | 1-1 (0-0) |
| «Դրոխեդա»-«Ստարտ» | 1-0, 11-12` 11 մ (0-1) |