Ինչպես տեղեկացանք ՀԱՕԿ-ի լրատվության պատասխանատու, մարմնամարզությունից ԽՍՀՄ սպորտի վարպետ Նաթելա Հովասափյանից, Հայաստանի ազգային օլիմպիական կոմիտեի նախագահ Գագիկ Ծառուկյանի հրավերով սեպտեմբերի 7-ին Հայաստան է այցելելու Եվրոպայի օլիմպիական կոմիտեի (ԵվՕԿ) նորընտիր նախագահ, միջազգային օլիմպիական կոմիտեի անդամ, Իռլանդիայի օլիմպիական կոմիտեի նախագահ Պատրիկ Հիկեի գլխավորած պատվիրակությունը: Սա նրա առաջին պաշտոնական այցն է ԵվՕԿ-ի նախագահի պաշտոնում: Պատվիրակության կազմում են ՄՕԿ-ի «Օլիմպիական համերաշխություն» ծրագրերի փոխտնօրեն Պամելա Վայփոնդը եւ ԵվՕԿ-ի ֆինանսների ադմինիստրացիայի մենեջեր Ջանլուկա դե Անջելեսը:
Հյուրերը կհանդիպեն ՀԱՕԿ-ի ղեկավարության, գործկոմի անդամների, տարբեր մարզաձեւերի ֆեդերացիաների նախագահների, մարզաշխարհի անվանի ներկայացուցիչների հետ: Պատվիրակությանը կընդունի ՀՀ նախագահ Ռոբերտ Քոչարյանը: Այցի նպատակն է ծանոթանալ Հայաստանում օլիմպիական շարժման գործընթացին, կատարված աշխատանքին, մարզակառույցներին եւ, իհարկե, ՀԱՕԿ-ի առջեւ ծառացած խնդիրներին: Հյուրերը կլինեն Աբովյանի նորակառույց մարզաբազայում, կայցելեն Սեւան եւ Մատենադարան: