«ԱԶԳ» ՕՐԱԹԵՐԹ

ԱՐԿԱԴԻ ՂՈՒԿԱՍՅԱՆ. «ԱԴՐԲԵՋԱՆԻ ԴԻՎԱՆԱԳԻՏԱԿԱՆ ԿՈՐՊՈՒՍՆ ԱՆԸՆԴՀԱՏ ՀԱՐՁԱԿՎՈՒՄ Է. ՄԻԳՈՒՑԵ ԺԱՄԱՆԱԿՆ Է, ՈՐ ՄԵՆՔ ԷԼ ԱՆՑՆԵՆՔ ՀԱՐՁԱԿՄԱՆ»

ՄԱՐԻԵՏԱ ԽԱՉԱՏՐՅԱՆ, Հադրութ-Երեւան

Սեպտեմբերի 11-ին Հադրութի շրջանի Նորաշեն գյուղում ԼՂՀ նախագահ Արկադի Ղուկասյանը պատասխանել է մի քանի լրագրողի, այդ թվում` «Ազգի» թղթակցի հարցերին:

- Վարդան Օսկանյանն ասել է, որ եթե Ադրբեջանն ուզում է արդյունավետ պայքարել հրդեհների դեմ, ապա պետք է դիմի ԼՂՀ իշխանություններին: ՄԱԿ-ում բանաձեւ է ընդունվել հրդեհների դեմ` ԵԱՀԿ-ից օգնական առաքելություն պետք է ուղարկվի, արդյոք որեւէ արձագանք եղե՞լ է, ուղարկե՞լ են դիտորդական խմբին, եւ ի՞նչ կարծիք ունեք Ադրբեջանի հետ համագործակցելու հնարավորության մասին:

- Առաջին հերթին ասեմ, որ դա մեր առաջարկն էր: Երբ Ադրբեջանն աղմուկ բարձրացրեց հրդեհների հարցով, պարզ է, որ սա շատ արհեստական աղմուկ է, որովհետեւ հրդեհների հեղինակներն էլ են իրենք, քարոզչության էլ: Հարցն այն է, որ մենք բազմիցս դիմել ենք տարբեր միջազգային կազմակերպությունների` առաքելություն ուղարկելու հարցով, որովհետեւ մենք ինքներս ենք շահագրգռված, որ միջազգային հանրությունը հստակ պատկերացում ունենա, թե ի՞նչ է տեղի ունենում Լեռնային Ղարաբաղի սահմանամերձ շրջաններում: Դա մեր առաջարկն էր, եւ այսօր, քանի որ պատրաստվում է ԵԱՀԿ առաքելությունն այստեղ գալ, բնական է, որ նրանք պետք է համագործակցեն ԼՂՀ իշխանությունների հետ: Դեռ որեւէ պաշտոնական դիմում չի եղել, բայց վստահ եմ, որ կլինի, մենք պատրաստ ենք ընդունել այդ առաքելությունը, եւ ես վստահ եմ, որ այդ առաքելությունը օբյեկտիվ եզրակացություն կստեղծի այն իրադարձությունների մասին, որ տեղի են ունենում Լեռնային Ղարաբաղում: ((Ի դեպ, Ադրբեջանը երեկ խոչընդոտեց առաքելության գործունեությանը: Խմբ.) Իսկ Ադրբեջանի նպատակը նույնն է` սեւացնել ամեն ինչ, որ կապված է Ղարաբաղի հետ:

- Համագործակցության համար որեւէ դիմում, որեւէ առաջարկ եղե՞լ է:

- Ադրբեջանի կողմից որեւէ դիմում չի եղել, բնական է, որովհետեւ ես չեմ գտնում, որ իրենց նպատակը համագործակցություն ու կառուցողական մթնոլորտի ստեղծումն է: Ադրբեջանը հետապնդում է ուրիշ նպատակներ` պրոբլեմներ ստեղծել Լեռնային Ղարաբաղի շուրջը, հասնել նրան, որ միջազգային հանրությունը դատապարտի կամ պատժի այն, ինչ տեղի է ունենում Լեռնային Ղարաբաղում:Եթե լինեին Ադրբեջանի կողմից այդ կարգի առաջարկներ, մենք սիրով կընդունեինք: Ընդհակառակն, ասեմ, որ բազմիցս մենք ենք դիմել Ադրբեջանի ղեկավարությանը, ե՛ւ ԵԱՀԿ-ին, ե՛ւ ուրիշ միջազգային կազմակերպությունների միջնորդությանը, որովհետեւ մենք գտնում ենք, որքան շատ մենք շփվենք Ադրբեջանի ոչ միայն ղեկավարների, այլեւ տարբեր կազմակերպությունների հետ, այնքան մեծ հնարավորություններ կունենանք հարցն ընդհանրապես կարգավորելու համար: Մենք ունենք բազմաթիվ խնդիրներ սահմանամերձ շրջաններում` ջրի, նույն հրդեհների, եւ ես վստահ եմ, որ Ադրբեջանի բնակչությունը, որն ապրում է սահմանում, շահագրգռված է այդ շփումներով, որովհետեւ կենսական հարցեր են իրենց համար լուծվելու: Բայց դրան միշտ դեմ է եղել Ադրբեջանի ղեկավարությունը, որը մերժում է ցանկացած առաջարկ շփումների վերաբերյալ: Եվ տվյալ դեպքում ես վստահ եմ, որ Ադրբեջանին ոչ թե հարցի էությունն է հետաքրքրում, այլ քարոզչական աղմուկը, որ ստեղծում է Ղարաբաղի շուրջը:

- Բրայզայի իրարամերժ հայտարարությունները ի՞նչ են ասում, կարգավորման պատուհանն արդեն փակվա՞ծ է այս տարի: Նաեւ Դուք ռադիոհարցազրույցում օրերս ասել էիք, թե միջազգային ճանաչումն է հարցի լուծման տարբերակ:

- Միջազգային ճանաչումը միշտ էլ տարբերակ է եղել, նոր չի ծնվել այդ գաղափարը, որովհետեւ մենք վստահ ենք, որ Ղարաբաղի ապագան նրա կարգավիճակի դե յուրե միջազգային ճանաչումն է: Ինչ վերաբերում է պատուհանին, մենք երբեւէ պատուհան չենք փակել, ընդհակառակը, մենք աշխատում ենք բաց պահել պատուհանը, եւ ես հույս ունեմ, որ պատուհանը փակված չէ, եւ մենք պատրաստ ենք կառուցողական երկխոսության Ադրբեջանի հետ:

- Ինչպե՞ս եք վերաբերվում, որ հարցը տեղափոխվել է ՄԱԿ:

- Ես համարում եմ, որ դա դեստրուկտիվ մոտեցում է, որովհետեւ այս տարիների ընթացքում մեր հարցով զբաղվել է ԵԱՀԿ Մինսի խումբը, ուրիշ միջազգային կազմակերպություններ ընդգրկելու ամեն մի փորձ մի քիչ խառնաշփոթ վիճակ կարող էր ստեղծել, որը ձեռնտու չէ ոչ հակամարտության կողմերին, ոչ էլ ընդհանրապես հարցի կարգավորման համար:

- Մենք կարո՞ղ էինք դրա դեմն առնել, ինչ որ բան պակա՞ս ենք արել:

- Եթե խոսքը Լեռնային Ղարաբաղի մասին է, մենք դժբախտաբար ներկայացված չենք այդ միջազգային կառույցներում: Հայաստանը շատ հստակ արտահայտել է իր կարծիքը, այն է` ցանկացած ուրիշ միջազգային կազմակերպություն չպետք է զբաղվի այն հարցերով, որոնցով արդեն զբաղվում է ԵԱՀԿ-ն:

- Այդ դեպքում մեր կողմից ճիշտ դիվանագիտական գործիքներ ընտրելու մասի՞ն է խոսքը:

- Երեւի հայկական դիվանագիտությունը պետք է լինի ավելի ակտիվ: Դժբախտաբար այսօր ստեղծվել է մի իրավիճակ, երբ Ադրբեջանի դիվանագիտական կորպուսն անընդհատ հարձակվում է, եւ մենք ստիպված ենք պաշտպանվել: Գուցե ժամանակն է, որ մենք էլ սկսենք հարձակվել: