Ֆուտբոլի Հայաստանի բարձրագույն խմբի առաջնության մասնակիցները վաղուց ի վեր մրցաշարային աղյուսակում երկու քառյակների են բաժանվել, որոնց միջեւ միավորների զգալի տարբերություն է հաստատվել: Առաջատար քառյակը պայքարում է մրցանակային տեղերի, իսկ երկրորդ քառյակը` բարձրագույն խմբում իր տեղը պահպանելու համար:
Առաջնության 20-րդ տուրն ավարտվեց առաջին եւ երկրորդ քառյակներում տեղ գրաված թիմերի մրցավեճով: «Հանրապետական» մարզադաշտում մրցանակային տեղերի հավակնորդ «Բանանցը» հյուրընկալել էր «Կիլիկիային»: Շատերը «Բանանցին» հեշտ հաղթանակ էին գուշակում` հաշվի առնելով, որ «Կիլիկիայում» այսօր առավելապես երիտասարդ եւ անփորձ ֆուտբոլիստներ են հանդես գալիս: Ինչպես երեւում է, «Բանանցի» ֆուտբոլիստներն էլ նույն կարծիքի էին, քանի որ նրանք առաջին խաղակեսում անկազմակերպ խաղ ցուցադրեցին: «Կիլիկիան» ապավինելով հակագրոհներին, առաջին խաղակեսում վստահ էր գործում պաշտպանությունում: Հյուրերը ոչ միայն սեփական դարպասն անառիկ պահեցին, այլեւ հակագրոհներից մեկի ժամանակ հասան հաջողության: Աչքի ընկավ «Կիլիկիայի» ռմբարկու Սարգիս Մովսիսյանը:
Բաց թողած գոլը ստիպեց դաշտի տերերին դիմելու վճռորոշ գործողությունների: 2-րդ խաղակեսի սկզբում օգտվելով «Կիլիկիայի» դարպասապահի ու պաշտպանների սխալից, ընդամենը 2 րոպեում Սեմյոն Մուրադյանն ու Սամվել Մելքոնյանը հաշվի մեջ առաջ մղեցին «Բանանցին»: Հաղթելով 2-1 հաշվով, «Բանանցը» շարունակում է ընթանալ 2-րդ տեղում:
Կապանում տեղի «Գանձասարի» եւ «Շիրակի» մրցավեճի ելքը վճռեց դաշտի տերերի վրաց լեգեոնական Գագա Թբիլաշվիլու խփած միակ գնդակը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 20 | 16 | 3 | 1 | 57-15 | 51 |
| 2. Բանանց | 20 | 14 | 1 | 5 | 48-19 | 43 |
| 3. Միկա | 20 | 12 | 4 | 4 | 31-14 | 40 |
| 4. Արարատ | 20 | 10 | 4 | 6 | 34-25 | 34 |
| 5. Գանձասար | 20 | 6 | 2 | 12 | 20-44 | 20 |
| 6. Կիլիկիա | 20 | 4 | 3 | 13 | 24-46 | 15 |
| 7. Շիրակ | 20 | 3 | 6 | 11 | 12-42 | 15 |
| 8. Ուլիս | 20 | 3 | 1 | 16 | 18-39 | 10 |
Ռմբարկուները
| Արամ Հակոբյան | «Բանանց» | 17 |
| Նշան Էրզրումյան | «Արարատ» | 16 |
| Արմեն Շահգելդյան | «Միկա» | 12 |
| Արսեն Ավետիսյան | «Փյունիկ» | 11 |
| Ալեքս. Պետրոսյան | «Փյունիկ» | 10 |
| Արթուր Քոչարյան | «Գանձասար» | 10 |
ԱՇՈՏ ՀԱՅՐԱՊԵՏՅԱՆ