Փարիզի դատարանը երեքշաբթի օրը եռամսյա պայմանական բանտարկության եւ 7500 եվրո տուգանքի է դատապարտել համալսարանական նախկին պրոֆեսոր, 77-ամյա Ռոբեր Ֆորիսոնին, որը հրապարակավ ժխտել էր հրեաների ողջակիզման փաստը:
Ֆրանսպրեսը հաղորդում է, որ Լիոնի համալսարանի գրականության նախկին դասախոսը 2005 թ. փետրվարին իրանական արբանյակային հեռուստաալիքի եթերում հայտարարել է հետեւյալը. «Գերմանացիները ոչ մի գազախուց էլ չեն ունեցել, եւ Օսվենցիմ այցելող միլիոնավոր զբոսաշրջիկները տեսնում են միայն սուտ եւ կեղծարարություն»:
Պետական մեղադրողը նախապես պահանջել էր Ֆորիսոնից բռնագանձել 45 հազար եվրո եւ նրան դատապարտել մեկ տարվա բանտարկության: Բայց դատարանը սահմանափակվեց ավելի մեղմ պատժով:
Ֆորիսոնը մեղադրվում է նաեւ «հակամարդկային ոճրի գոյության ժխտմանը մեղսակից լինելու» մեջ, ուստի պարտավոր է մեկական եվրո խորհրդանշական տույժեր վճարել դատավարությանը որպես քաղաքացիական հայցվորներ մասնակցած հակառասիստական երեք կազմակերպություններին:
Ի դեպ, հոկտեմբերին Թեհրանում տեղի կունենա Հոլոքոսթի ոճիրների գիտական ապացույցների գնահատմանը նվիրված միջազգային խորհրդաժողով: Իրանի իշխանություններն այդ ոճիրների փաստերը համարում են խիստ չափազանցված: Խորհրդաժողովից առաջ Թեհրանում Հոլոքոսթի թեմայով բացված ծաղրանկարների ցուցահանդեսը տեղի հասարակայնության շրջանում առանձնակի հետաքրքրություն չի առաջացրել: