Շիրակի մարզում 88-ի ավերիչ երկրաշարժի հետեւանքների վերացման խնդիրն առ այսօր օրակարգային է մնում ինչպես Գյումրի քաղաքի, այնպես էլ բազմաթիվ գյուղական բնակավայրերի համար: Մարզպետարանի քաղաքաշինության վարչության պետ Ալբերտ Մարգարյանի հայտնած տվյալներով այստեղ ներկայումս հաշվվում է երկրաշարժից անօթեւան 430 գյուղական ընտանիք: Նրանց թիվն ամենից շատ է Գյումրուն մերձակա Ախուրյանի տարածաշրջանում: 173 ընտանիք դեռ անօթեւան է նախկին շրջկենտրոն Ախուրյանում, 50-ը` Մուսայելյան գյուղում, 45-ըՙ Ջաջուռում, 33-ըՙ Հացիկում եւ այլն:
Ի տարբերություն մարզկենտրոն Գյումրու, որտեղ տակավին 4000-ից ավելի անօթեւան ընտանիքների առկայության պայմաններում արդեն երրորդ տարին պետական բնակարանաշինական ծրագրեր չեն իրականացվում, մարզի գյուղական բնակավայրերում անցյալ տարվանից պետբյուջեի միջոցների հաշվին իրագործվում է կիսավարտ բնակելի տների կառուցում: 2005 թ. այդ նպատակով հատկացված 220 մլն դրամով լրակառուցվել են 55 այդպիսի տներ: Այս տարի ծրագրին հատկացված է 195 մլն դրամ, որով մոտ մեկ ամսից կավարտվի եւս 34 բնակարանների կառուցումը: Սակայն միայն այս ծրագրով գյուղական անօթեւանների խնդիրը եւս ամբողջությամբ լուծվել չի կարող: Նշված 430 ընտանիքներից միայն 123-ն ունեն կիսակառույց բնակելի տներ:
Գ. Մ.