Իան Պորտերֆիլդը կրկնեց Էդուարդ Մարգարովի ցուցանիշը
Հայաստանի ազգային հավաքականը կրկին անհաջող է սկսել հերթական ընտրական մրցաշարը` 3 հանդիպումներում վաստակելով ընդամենը մեկ միավոր, չկարողանալով գեթ մեկ անգամ գրավել մրցակիցների դարպասները: Ընդհանրապես ընթացիկ մրցաշրջանում ՀՀ հավաքականում «գոլային երաշտ» է սկսվել: Տարեսկզբին Կիպրոսում Հենկ Վիսմանի գլխավորությամբ անցկացրած ընկերական երկու հանդիպումներում էլ մեր ֆուտբոլիստները չեն կարողացել գրավել Ռումինիայի եւ Կիպրոսի հավաքականների դարպասները` մրցակիցներին զիջելով միեւնույն 0-2 հաշվով:
Հայաստանի հավաքականը 7-րդ անգամ է մասնակցում աշխարհի (3 անգամ) եւ Եվրոպայի (4) առաջնությունների ընտրական մրցաշարերին: Եկեք մի հետադարձ հայացք նետենք եւ տեսնենք, թե ինչպիսին են եղել մեր հավաքականի ցուցանիշներն ընտրական մրցաշարերում անցկացրած առաջին երեք հանդիպումներից հետո:
Հայաստանի հավաքականին միայն մեկ անգամ է հաջողվել ընտրական մրցաշարը սկսել հաղթանակով: Դա 2000 թ. Եվրոպայի առաջնության ընտրական մրցաշարն էր, որի մեկնարկում մեր ֆուտբոլիստները Սուրեն Բարսեղյանի գլխավորությամբ սեփական հարկի տակ 3-1 հաշվով հաղթեցին Անդորրայի հավաքականին: Հաջորդ տուրում կրկին Երեւանում, իսլանդացիների հետ խաղն ավարտվեց ոչ-ոքի (0-0), իսկ ընտրական 3-րդ հանդիպումում հյուրընկալվելիս ՀՀ հավաքականը զիջեց ուկրաինացիներին (0-2): Այսպիսով, մեկնարկային 3 խաղում մեր հավաքականը վաստակեց 4 միավոր: Դա առայժմ լավագույն արդյունքն է, որը հաջողվել է կրկնել 2004 թ. Եվրոպայի առաջնության ընտրական մրցաշարում: Արգենտինացի Օսկար Լոպեսի գլխավորությամբ մեկնարկում մեր հավաքականը նախ Երեւանում ոչ-ոքի (2-2) խաղաց ուկրաինացիների հետ, ապա հյուրընկալվելիս զիջեց հույներին (0-2): Իսկ 3-րդ խաղում արդեն Միխայ Ստոյկիցայի գլխավորությամբ հավաքականն իր անդրանիկ հաղթանակը տարավ` պարտության մատնելով Հս. Իռլանդիայի ընտրանուն (1-0):
Բոլորից անհաջողը ֆրանսիացի Բեռնար Կազոնիի գլխավորությամբ 2006 թ. աշխարհի առաջնության ընտրական մրցաշարի մեկնարկն էր, որում մեր թիմն առաջին երեք հանդիպումներում էլ պարտվեց Մակեդոնիայի (0-3) եւ Ֆինլանդիայի (0-2, 1-3) հավաքականներին:
Ինչպես եւ Իան Պորտերֆիլդի օրոք, 1996 թ. Եվրոպայի առաջնության ընտրական մրցաշարում էլ մեր ֆուտբոլիստներին Էդուարդ Մարգարովի գլխավորությամբ չի հաջողվել առաջին երեք խաղերում գրավել մրցակիցների դարպասները: Այդ տարի հավաքականն ընտրական մրցաշարը սկսեց բելգիացիների հետ արտագնա խաղում կրած պարտությամբ (0-2), ապա Երեւանում ոչ-ոքի (0-0) խաղաց Կիպրոսի հավաքականի հետ եւ վերջինիս զիջեց մրցակցի դաշտում (0-2):
Երկու անգամ մեր հավաքականն ընտրական մրցաշարը սկսել է գոլազուրկ ոչ-ոքիով: 1998 թ. աշխարհի առաջնության ընտրական մրցաշարի մեկնարկում, Երեւանում մեր ֆուտբոլիստները ոչ-ոքի են խաղացել պորտուգալացիների հետ Խորեն Հովհաննիսյանի գլխավորությամբ: Իսկ 2002 թ. աշխարհի առաջնության ընտրական մրցաշարում Վարուժան Սուքիասյանի օրոք հաջողվել է դարպասն անառիկ պահել նորվեգացիների հետ արտագնա խաղում:
Ստորեւ ներկայացնում ենք ընտրական մրցաշարերի մեկնարկային 3 տուրերում մեր հավաքականի ցուցանիշները:
Սերբիայի հավաքականը 44-րդ ընտրանին էր, որի հետ մրցեց Հայաստանի հավաքականն իր 15-ամյա պատմության ընթացքում: Այսօրվա դրությամբ մեր հավաքականի հաշվեկշիռն այսպիսին է` 95 խաղ, +18=22-55, 69-172:
Ընտրական մրցաշար
| Խ | Հ | Ո | Պ | Գ | Մ | Մարզիչ | |
| 1996 ԵԱ | 3 | 0 | 1 | 2 | 0-4 | 1 | Էդուարդ Մարգարով |
| 1998 ԱԱ | 3 | 0 | 2 | 1 | 2-6 | 2 | Խորեն Հովհաննիսյան |
| 2000 ԵԱ | 3 | 1 | 1 | 1 | 3-3 | 4 | Սուրեն Բարսեղյան |
| 2002 ԱԱ | 3 | 0 | 1 | 2 | 3-5 | 1 | Վարուժան Սուքիասյան |
| 2004 ԵԱ | 3 | 1 | 1 | 1 | 3-4 | 4 | Օսկար Լոպես, Միխայ Ստոյկիցա |
| 2006 ԱԱ | 3 | 0 | 0 | 3 | 1-8 | 0 | Բեռնար Կազոնի |
| 2008 ԵԱ | 3 | 0 | 1 | 2 | 0-4 | 1 | Իան Պորտերֆիլդ |
ԱՇՈՏ ՀԱՅՐԱՊԵՏՅԱՆ