Երեկ, ինչպես եւ նախապես հայտնի էր, Փարիզում տեղի ունեցավ Հայաստանի եւ Ադրբեջանի արտաքին գործերի նախարարների հանդիպումը: ՀՀ ԱԳՆ հաղորդագրության համաձայն, ԵԱՀԿ Մինսկի խմբի համանախագահների հովանու ներքո Հայաստանի արտգործնախարար Վարդան Օսկանյանը եւ Ադրբեջանի ԱԳ նախարար Էլմար Մամեդյարովը շարունակել են ԱԳ նախարարների մոսկովյան հոկտեմբերի 6-ի հանդիպմանը համանախագահների առաջարկած նոր գաղափարների ու մտքերի քննարկումները:
Չմանրամասնելով, թե ինչ ասել է նոր գաղափարներ եւ մտքեր, Հայաստանի արտգործնախարարությունը տեղեկացնում է, որ դիրքորոշումների լրացուցիչ ճշգրտման համար նախարարների մակարդակով խորհրդատվությունները կշարունակվեն Բրյուսելում, նոյեմբերի 14-ին Հայաստան-Եվրոմիություն համագործակցության խորհրդի շրջանակներում: