Երեկ կառավարության հետ Ազգային ժողովի պատգամավորների հարցուպատասխանի ընթացքում, պատասխանելով Արամ Գ. Սարգսյանի հարցին, արտգործնախարար Վարդան Օսկանյանը նշել է, որ ղարաբաղյան հակամարտության կարգավորման բանակցությունների օրակարգում տարածքների վերադարձի հարց, իրոք, առկա է սակայն փաթեթում առաջնայինը Ղարաբաղի ժողովրդի ինքնորոշման եւ կարգավիճակի հարցն է, որին փուլ առ փուլ հաջորդելու են մյուս հարցերը: Բանակցության թեմա է նաեւ Ադրբեջանի վերահսկողության տակ գտնվող հայկական Մարտակերտի եւ Մարտունու շրջանների տարածքների մի մասը, թեեւ վերջիններս Ղարաբաղի վերահսկողության տակ գտնվող տարածքների հետ նույն հարթության վրա չեն դիտարկվում: Մի խոսքով, ըստ Օսկանյանի, կարգավորման փաթեթը միգուցե իրականացվի փուլային եղանակով, բայց դա ընդունվելու է որպես մի ամբողջ փաթեթ:
Վերը բերված տեսակետը Վարդան Օսկանյանն արտահայտեց ԵԱՀԿ Մինսկի խմբի համանախագահների ներկայացրած նոր մտքերի առումով, որոնք մատուցվել են դեռեւս հոկտեմբերի 6-ին, նրա եւ Էլմար Մամեդյարովի հանդիպման ընթացքում, իսկ արդեն հոկտեմբերի 24-ին, Փարիզում, համանախագահների եւ երկու նախարարների հանդիպման ընթացքում վերջիններս ներկայացրել են իրենց դիրքորոշումն այդ նոր մտքերի վերաբերյալ: Ընդ որում` հայկական կողմը նաեւ Ղարաբաղի տեսակետն է ներկայացրել: Նոր մտքերի վերաբերյալ համաձայնության եզրեր չկան, ասաց Վարդան Օսկանյանը, բայց համանախագահներն ու նախարարները նոյեմբերի 14-ին, Բրյուսելում նորից են փորձելու այդ եզրերը գտնել, իսկ Բրյուսելի հանդիպումից հետո համանախագահները կայցելեն տարածաշրջան:
Մ. Խ.