Կալիֆոռնիայի հայ գրողների միության (ԿՀԳՄ) հոկտեմբեր ամսվա հերթական գրական հանդիպումը` մշակույթի օրվա առիթով, կայացավ օրեր առաջ Գլենդեյլի հանրային գրադարանի լսասրահում: Հանդիպմանը ԿՀԳՄ նախագահ Գրիշ Դավթյանը ներկայացրեց նորահրատարակ հետեւյալ գրքերը` Պողոս Գուբելյանի «Աֆրիկական համանվագ» կարճ պատմվածքների անգլերեն հավաքածուն, Թերմինե Մանուկյանի «Ժպտա սիրելիս» անգլերեն եւ «Ադաջիո» բանաստեղծությունները, Աստղիկ Թոփչյանի «Օջախ» եւ Գուսան ապոր «Սրտի աղբյուր» բանաստեղծությունները:
Ստացված տեղեկության համաձայն, ներկա գրողներից ոմանք ներկայացրել են պատառիկներ գրական ստեղծագործություններից, հանդես եկել ելույթներով, իսկ բանաստեղծ Ներսես Տեր-Մեսրոպյանը հակիրճ ներկայացրել է հայ մշակույթի օրվա տոնակատարության սկզբնավորումը, տոնի ներառումը մեր ազգային եւ եկեղեցական օրացույցում:
Գ. Գ.