Ռուս-վրացական հարաբերությունների խրթին ընթացքը ստիպում է շատ վրացիների Ռուսաստանում ունեցած աշխատանքը եւ ընդհանրապես բնակվելու հնարավորությունը չկորցնելու համար դիմել տարբեր միջոցների: Ինչպես տեղեկացնում է «Դեյ.ազ» գործակալությունը, օրերս ժամանակավորապես Բաքվում գտնվող Վրաստանի մի քաղաքացի հայտնել է, որ 3 հազար դոլարով Ադրբեջանի քաղաքացիություն ստանալու համար դիմել ու համաձայնություն է ստացել Բաքվի ոստիկանության շրջանային բաժանմունքներից մեկում: Նույն աղբյուրի համաձայն, Ադրբեջանի ներքին գործերի նախարարությունը հերքում է լուրը, ընդգծելով սեփական երկրի քաղաքացիությունից հրաժարվելու անհրաժեշտությունը Ադրբեջանի քաղաքացիություն ստանալու համար եւ ապօրինաբար այն տրամադրելու դեպքում օրենքի ողջ խստությամբ պատժելու հեռանկարը:
Ն. Պ.