Գաֆեսճյան թանգարան հիմնադրամը հայտարարում է միջազգային ճանաչում ունեցող քանդակագործ Փոլ Քոքսի «Ահոյ» քանդակի բացումը: Գաֆեսճյան արվեստի հավաքածուի մաս կազմող այս քանդակը տեղադրվել է Կասկադի դիտահարթակում` Ֆերնանդո Բոթերոյի «Հռոմեական զինվոր»-ի հարեւանությամբ: Երկշերտ պոլիյուրեթեյնով ներկված մետաղյա հսկա նավն ունի վեց մետր բարձրություն եւ տեղադրված է սեղանին:
Փոլ Քոքսը ծնվել է 1975 թ.-ին Միացյալ Թագավորության Բրայթն քաղաքում: Գերազանցությամբ ավարտելով Լոնդոնի հեղինակավոր Արվեստների թագավորական ակադեմիայի կերպարվեստի բաժինը` ստացել է մագիստրոսի աստիճան: Քոքսի գործերն այժմ գտնվում են բազմաթիվ մասնավոր եւ հանրային հավաքածուներում: «Ահոյ»-ը ներկայացնում է, թե ինչպես ծաղրանկարը, արտացոլելով իրական աշխարհը, միաժամանակ դուրս է այդ իրականությունից: Քանդակը ցուցադրվել է Անգլիայի «Փրայդ ըֆ դը վելի» (Pride of the Valley) քանդակների այգում` Սալվադոր Դալիի, Ջորջ Էփստայնի եւ Մաքս Էռնստի գործերի կողքին: