Մարսելի հին նավահանգստի «Սոֆիտել» հյուրանոցում դեկտեմբերի 16-ին տեղի կունենա Հայ գրքի ազգային փառատոն, որը Ֆրանսիայում Հայաստանի տարվա շրջանակներում անցկացվելու է Շառլ Ազնավուրի բարձր հովանավորությամբ: Փառատոնի պատվավոր հյուրը կլինի հայ անվանի գրող Պերճ Զեյթունցյանը:
Ֆրանսիայից ստացված տեղեկատվության համաձայն, փառատոնի մրցույթին ներկայացված 26 գործերի թվում են Էլեն Կերիլիսի «Հայաստանի հեքիաթներ. հերոսապատում, պատմվածքներ եւ ժողովրդական հեքիաթներ», Ֆիլիպ Վիդըլյեի «Թուրքական գիշեր», Մայքլ Առլեն-կրտսերի «Ուղեւորություն դեպի Արարատ», Լուի Գառզուի «Ութերորդ բլուր», Փիթեր Բալաքյանի «Տիգրիսը բոցերի մեջ», Էսթեր Հեբոյանի «Ստամբուլի ուղեւորները», Ժան-Մարի Գառզուի «Հայաստան, 1915», Ռեմոն Գեւորգյանի «Հայոց ցեղասպանություն», Անտոնիա Արսլանի «Մի անգամ Հայաստանում», Ժերար Շալյանի «1915, հայոց եղեռնը», Ժան-Պիեռ Մահեի «Հայաստանը դարերի փորձության մեջ», Վիկտոր Բերարի «Սուլթանի քաղաքականությունը. հայերի ջարդը 1896 թ.», Իվ Թեռնոնի «Ձայնի բեկորներ» գրքերը:
Փառատոնի «Շառլ Ազնավուր եւ Հայաստան-2006» մրցանակների ժյուրիի կազմում են դրա պատվո նախագահ, ֆրանսիական ակադեմիայի անդամ Անրի Թրուայան, փառատոնի ժյուրիի նախագահ, «Էքսպրես» հանդեսի փոխտնօրեն Քրիստիան Մակարյանը, Հայաստանում Ֆրանսիայի դեսպան Անրի Կյունին, Ֆրանսիայի արդյունաբերության նախկին նախարար Պատրիկ Դեւեջյանը, «Հիշողության Եվրոպա» ընկերակցության նախագահ, Ֆրանսիայի հայկական կազմակերպությունների համակարգման խորհրդի նախագահ Ալեքսի Գյովչյանը, Ֆրանսիայի կինոպրոդյուսերների միության նախագահ, «Սեզարների» ակադեմիայի նախագահ եւ Կաննի փառատոնի կառավարիչ Ալեն Թերզյանը, «Պուեն» հանդեսի տնօրեն Ֆրանց-Օլիվիե Ժիեսբերը, հեռուստալրագրող եւ գրող Ժակ Շանսելը եւ ուրիշներ:
Դեկտեմբերի 16-ի հետմիջօրեին հեռուստալրագրող Թիերի Բեզեն «կլոր սեղան» կկազմակերպի «Հայ գրականությունն այսօր Ֆրանսիայում» թեմայով: Կմասնակցեն գրող եւ գրականագետ Գրիգոր Պըլտյանը, հրատարակիչ Վարուժան Արզումանյանը, «Սայաբալյան» ինստիտուտի նախագահ եւ «Արմենիա» հանդեսի համահիմնադիր Օհան Հեքիմյանը:
Նույն օրը տեղի կունենան Պերճ Զեյթունցյանի մամլո ասուլիսը, ինչպես նաեւ «Շառլ Ազնավուր եւ Հայաստան-2006», «Արարատ», Մարսել քաղաքի, մամուլի մրցանակների եւ «Էկյուրեոյ» հիմնադրամի հատուկ մրցանակի շնորհման արարողությունը, որին ներկա կլինեն Մարսելի քաղաքապետ, Սենատի փոխնախագահ Ժան-Կլոդ Գոդենը եւ այլ պաշտոնական անձինք:
Պ. ՔԵՇԻՇՅԱՆ