Հանդբոլի Հայաստանի ֆեդերացիայի նախագահ Սարգիս Գրիգորյանի նախաձեռնությամբ մարզաձեւի Հայաստանի աղջիկների եւ պատանիների հավաքականը ցուցադրական-ընկերական մրցախաղեր անցկացրեց ԼՂՀ Քաշաթաղի շրջանի Բերձորի մարզադպրոցի սաների հետ: Այդ հանդիպումները մեծ ոգեւորություն էին առաջացրել տեղի մարզասերների շրջանում: Ներկաներին ողջունեց ֆիզկուլտուրայի ինստիտուտի խաղային մարզաձեւերի ամբիոնի վարիչ, հանդբոլի ՀՀ ֆեդերացիայի փոխնախագահ Հարություն Մելքոնյանը: Ինչ խոսք, կայացած մրցախաղերը կնպաստեն Արցախում մարզաձեւի նկատմամբ հետաքրքրության աճին: Նշենք, որ Բերձորի մարզադպրոցում աշխատանքի են ընդունվել Երեւանի ֆիզկուլտուրայի ինստիտուտի հանդբոլի բաժնի շրջանավարտ Թամարա Հովհաննիսյանը, ինչպես նաեւ մարզաձեւի Հայաստանի հավաքականի նախկին անդամներ Գաբրիել եւ Մարինե Մարկոսյանները, որոնք իրենց աշխատանքով կնպաստեն հանդբոլի զարգացմանն ու մասսայականացմանը:
ԱՇՈՏ ՀԱՅՐԱՊԵՏՅԱՆ