Վլադիմիր Կարապետյանի պատասխանները Ադրբեջանի ԱԳՆ մամլո խոսնակի մեկնաբանություններին
ՀԱՐՑ.- Տրանսկասպիական գազամուղին Հայաստանի հնարավոր մասնակցության վերաբերյալ ՀՀ ԱԳ նախարարի վերջին հայտարարությունների առնչությամբ Ադրբեջանի ԱԳՆ մամուլի քարտուղար Թաղիզադեի որակումները, մեղմ ասած, տարակուսանք են առաջացնում: Ինչպե՞ս կմեկնաբանեք դրանք:
ՊԱՏԱՍԽԱՆ.- Չնայած այդ հաղորդագրության մեջ նշված էր, որ մեկնաբանություն անողը դիվանագետ է, ես լրջորեն կասկածում եմ, որ այդ աստիճան լկտի վարքագիծ կարող է ունենալ արտաքին գերատեսչության աշխատակիցը:
Թողնելով մեկնաբանության տկար քաղաքական ասպեկտը, կցանկանայի Ձեր ուշադրությունը հրավիրել այն հանգամանքի վրա, թե ինչպիսի փողոցային ձեւակերպումներով է հարեւան պետության առանցքային ստորաբաժանումներից մեկի ներկայացուցիչը հրապարակայնորեն ձեւակերպում իր միտքը` առաջին հերթին վարկաբեկելով իր իսկ անմիջական ղեկավարին:
Կարծում եմ, որ այսքանից հետո որեւէ մեկի մոտ պատրանք չի կարող լինել Ադրբեջանի` Լեռնային Ղարաբաղի հիմնախնդրի շուրջ ընթացող բանակցություններում մոտեցումների լրջության վերաբերյալ, քանզի նման ոճը ճգրիտ կերպով բացահայտում է ադրբեջանական ողջ ղեկավարության նկարագիրը: