Շվեյցարիայի Նիոն քաղաքում կայացել է ֆուտբոլի Եվրոպայի աղջիկների մինչեւ 17 եւ մինչեւ 19 տարեկանների առաջնության ընտրական մրցաշարի մասնակիցների վիճակահանությունը: Մինչեւ 17 տարեկանների մրցավեճում Հայաստանի հավաքականը վիճակահանությամբ ընդգրկվել է ընտրական 5-րդ խմբում, որտեղ նրա մրցակիցները կլինեն Ֆրանսիայի, Դանիայի եւ Մակեդոնիայի ընտրանիները: Ընտրական մրցաշարը կանցկացվի Մակեդոնիայում հոկտեմբերի 16-21-ը: Իսկ ահա մինչեւ 19 տարեկանների Եվրոպայի առաջնության ընտրական մրցաշարում վիճակահանությունը միեւնույն` ընտրական 7-րդ խմբում ընդգրկեց Հայաստանի եւ Ադրբեջանի հավաքականներին: Ընդ որում` այդ խմբի հանդիպումները տեղի կունենան Ադրբեջանում: Նույն խմբում են նաեւ Ուկրաինայի եւ Շոտլանդիայի հավաքականները: Բնականաբար, մեր հավաքականի համար լուրջ խնդիր է ստեղծվում Ադրբեջանում խաղերին մասնակցելը:
Հաջորդ փուլի ուղեգիր կնվաճեն խմբերում ուժեղագույնը ճանաչված երկուական հավաքականները, ինչպես նաեւ 3-րդ տեղ գրաված հավաքականներից լավագույն արդյունքի հասած երկու ընտրանիները: Ընդ որում` 3-րդ տեղ գրաված թիմերի ցուցանիշները հաշվարկելիս հաշվի չի առնվի խմբի հետնապահի հետ հանդիպման արդյունքը: Մինչեւ 17 տարեկանների ընտրական մրցաշարն անցկացվում է առաջին անգամ:
ԱՇՈՏ ՀԱՅՐԱՊԵՏՅԱՆ